कारोनाबाट मर्नेको संख्या २ लाख ४४ हजार नाघ्यो

२१ बैशाख, हेटौंडा । विश्वभर महारामारीको रुपमा फैलिरहेको कोरोना भाइरस (कोभिड–१९) बाट मृतकको २ लाख ४४ हजार नाघेको छ । 
कोरोना भाइरसको तत्थ्याङक सार्वजनिक गरिरहेको वेवसाइट वल्डोमिटरका अनुसार अहिलेसम्म कोरोना संक्रमणका कारण मर्नेको संखया २ लाख ४४ हजार ६ सय ४१ पुगेको छ । पछिल्लो २४ घण्टामा संक्रमणबाट ५ हजार १ सय ७८ जनाको मृत्यु भएको छ । 
यस्तै अहिलेसम्म कोरोना संक्रमणबाट विश्वभर कुल ३४ लाख ८० हजार ६ सय ७२ जना मानिस संक्रमित भएका छन् । पछिल्लो २४ घण्टामा मात्रै ८२ हजार ५ सय ७८ जना नयाँ संक्रमित थपिएका छन् ।
संक्रमितहरु मध्ये ठूलो संख्यामा उपचारपछि निको पनि भएका छन् । पछिल्लो तथ्यांक अनुसार ११ लाख ८ हजार ६५ जना संक्रमित उपचारपछि निको भएका छन् ।
यस्तै भाइरसका संक्रमणका कारण अहिले ५० हजार ८ सय ६४ जना गम्भीर अवस्थामा उपचार गराइरहेका छन् भने २० लाख ७७ हजार ३ सय २६ जनाको अवस्था मध्यम रहेको छ । 
कोरोनाको संक्रमणबाट सबैभन्दा बढी मानिसको मृत्यु अमेरिकामा भएको छ । यहाँ अहिलेसम्म ६७ हजार ४ सय २६ जनाको मृत्यु भईसकेको छ । पछिल्लो २४ घण्टामा अमेरिकामा १ हजार ६ सय ७३ जनाको मृत्यु भएको छ । 
अमेरिकापछि अहिलेसम्म इटलीमा सबैभन्दा बढी मानिसको मृत्यु भएको छ । यहाँ कोरोना संक्रमणबाट ज्यान गुमाउँनेको संख्या २८ हजार ७ सय १० पुगेको छ । पछिल्लो समय मृत्यु दर कम भइरहेको इटालीमा पछिल्लो २४ घण्टामा ४ सय ७४ जनाको मृत्यु भएको छ ।
यसैगरी स्पेनलाई पछिपार्दै बेलायत सबैभन्दा बढी संक्रमित मृत्यु हुनेको तेश्रो स्थानमा पुगेको छ । यहाँ अहिलेसम्म २८ हजार १ सय ३१ जनाको ज्यान गएको छ । पछिल्लो २४ घण्टामा मात्रै यहाँ ६ सय २१ जनाको मृत्यु भएको छ । 
यसैगरी कोरोनासंग जुधिरहेको अर्को यूरोपेली मुलुक स्पेनमा ज्यान गुमाउनेको संख्या २५ हजार १ सय पुगेको छ । यहाँ थप २ सय ७६ जनाको मृत्यु भएको छ । स्पेनमा पनि विगत केही दिन यता मृतकको संख्या घटिरहेको छ । 
यसैगरी फ्रान्समा संक्रमणबाट मृत्यु हुनेको संख्या २४ हजार ७ सय ६० पुगेको छ । यहाँ पछिल्लो समय १ सय ६६ जनाको ज्यान गएको छ ।
यसैगरी कोरोना भाइरसको संक्रमणबाट अहिलेसम्म बेल्जियममा ७ हजार ७ सय ६५, जर्मनीमा ६ हजार ८ सय १२, ब्राजिलमा ६ हजार ७ सय ५०, मध्यपूर्वी एसियाली मुलुक इरानमा ६ हजार १ सय ५६, नेदरल्याण्डसमा ४ हजार ९ सय ८७, चिनमा ४ हजार ६ सय ३३, क्यानडामा ३ हजार ५ सय ६६, टर्कीमा ३ हजार ३ सय ३६, स्वेडेनमा २ हजार ६ सय ६९, मेक्सिकोमा १ हजार ९ सय ७२, स्विटजरल्याण्डमा १ हजार ७ सय ६२ जनाले ज्यान गुमाएका छन् ।
यसैगरी वल्डोमिटरका अनुसार दक्षिण एसियाली मुलुक भारतमा अहिलेसम्म १ हजार ३ सय २३ जनाको ज्यान गएको छ । यहाँ पछिल्लो समय १ सय जना मृत थपिएका छन् । यस्तै अर्को दक्षिण एसियाली मुलुक पाकिस्तानमा मृत्यु हुनेको संख्या ४ सय ३७ पुगेको छन् । यहाँ २० जना मृतक थपिएका छन् ।