कोरोनाबाट मर्नेको संख्या २ लाख ५२ हजार नाघ्यो

२३ बैशाख, हेटौंडा । विश्वभर महारामारीको रुपमा फैलिरहेको कोरोना भाइरस (कोभिड–१९) बाट मर्नेको संख्या २ लाख ५२ हजार नाघेको छ । 
कोरोना भाइरसको तत्थ्याङक सार्वजनिक गरिरहेको वेवसाइट वल्डोमिटरका अनुसार अहिलेसम्म कोरोना संक्रमणका कारण मर्नेको संखया २ लाख ५२ हजार ३ सय ३७ पुगेको छ । पछिल्लो २४ घण्टामा संक्रमणबाट ४ हजार ९२ जनाको मृत्यु भएको छ । 
यस्तै अहिलेसम्म कोरोना संक्रमणबाट विश्वभर कुल ३६ लाख ४३ हजार २ सय ९ जना मानिस संक्रमित भएका छन् । पछिल्लो २४ घण्टामा मात्रै ७९ हजार ५ सय २० जना नयाँ संक्रमित थपिएका छन् ।
संक्रमितहरु मध्ये ठूलो संख्यामा उपचारपछि निको पनि भएका छन् । पछिल्लो तथ्यांक अनुसार ११ लाख ९४ हजार ४ सय ६८ जना संक्रमित उपचारपछि निको भएका छन् ।
यस्तै भाइरसका संक्रमणका कारण अहिले ४९ हजार ६ सय ३२ जना गम्भीर अवस्थामा उपचार गराइरहेका छन् भने २१ लाख ४६ हजार ८ सय ७२ जनाको अवस्था मध्यम रहेको छ । 
कोरोनाको संक्रमणबाट सबैभन्दा बढी मानिसको मृत्यु अमेरिकामा भएको छ । यहाँ अहिलेसम्म ६९ हजार ९ सय १७ जनाको मृत्यु भईसकेको छ । पछिल्लो २४ घण्टामा अमेरिकामा १ हजार ३ सय २० जनाको मृत्यु भएको छ । 
अमेरिकापछि अहिलेसम्म इटलीमा सबैभन्दा बढी मानिसको मृत्यु भएको छ । यहाँ कोरोना संक्रमणबाट ज्यान गुमाउँनेको संख्या २९ हजार ७९ पुगेको छ । पछिल्लो समय मृत्यु दर कम भइरहेको इटालीमा पछिल्लो २४ घण्टामा १ सय ९५ जनाको मृत्यु भएको छ ।
यसैगरी स्पेनलाई पछिपार्दै बेलायत सबैभन्दा बढी संक्रमित मृत्यु हुनेको तेश्रो स्थानमा पुगेको छ । यहाँ अहिलेसम्म २८ हजार ७ सय ३४ जनाको ज्यान गएको छ । पछिल्लो २४ घण्टामा मात्रै यहाँ २ सय ८८ जनाको मृत्यु भएको छ । 
यसैगरी कोरोनासंग जुधिरहेको अर्को यूरोपेली मुलुक स्पेनमा ज्यान गुमाउनेको संख्या २५ हजार ४ सय २८ पुगेको छ । यहाँ थप १ सय ६४ जनाको मृत्यु भएको छ । स्पेनमा पनि विगत केही दिन यता मृतकको संख्या घटिरहेको छ । 
यसैगरी फ्रान्समा संक्रमणबाट मृत्यु हुनेको संख्या २५ हजार २ सय १ पुगेको छ । यहाँ पछिल्लो समय ३ सय ६ जनाको ज्यान गएको छ ।
यसैगरी कोरोना भाइरसको संक्रमणबाट अहिलेसम्म बेल्जियममा ७ हजार ९ सय २४, जर्मनीमा ६ हजार ९ सय ९३, ब्राजिलमा ७ हजार ३ सय ४३, मध्यपूर्वी एसियाली मुलुक इरानमा ६ हजार २ सय ७७, नेदरल्याण्डसमा ५ हजार ८२, चिनमा ४ हजार ६ सय ३३, क्यानडामा ३ हजार ८ सय ५४, टर्कीमा ३ हजार ४ सय ६१, स्वेडेनमा २ हजार ७ सय ६९, मेक्सिकोमा २ हजार १ सय ५४ स्विटजरल्याण्डमा १ हजार ७ सय ८४ जनाले ज्यान गुमाएका छन् ।
यसैगरी वल्डोमिटरका अनुसार दक्षिण एसियाली मुलुक भारतमा अहिलेसम्म १ हजार ५ सय ६६ जनाको ज्यान गएको छ । यहाँ पछिल्लो समय १ सय ७५ जना मृतक थपिएका छन् । यस्तै अर्को दक्षिण एसियाली मुलुक पाकिस्तानमा मृत्यु हुनेको संख्या ४ सय ७६ पुगेको छन् । यहाँ १९ जना मृतक थपिएका छन् ।