अमेरिकामा कोरोनाबाट मर्नेको संख्या ७० हजार नजिक

२३ बैशाख, हेटौंडा । अमेरिकामा कोरोना भाइरस अर्थात कोभिड १९ बाट मर्नेको संख्या ६९ हजार नाघेको छ । 
कोभिड १९ को तथ्याङक प्रस्तुत गरिरहेको वल्डोभिटरका अनुसार अमेरिकामा पछिल्लो २४ घण्टामा १ हजार ३ सय २० जनाको मृत्यु भएको छ । यो सँगै यहाँ संक्रमणबाट मर्नेको कुल संख्या ६९ हजार ९ सय २१ पुगेको छ ।
अहिलेसम्म अमेरिकामा १२ लाख १२ हजार ८ सय ३५ जना मानिस संक्रमित भएका छन् । यहाँ एकैदिन थप २४ हजार ६ सय ७८ जना नयाँ संक्रमित थपिएका छन् ।
अमेरिकामा १६ हजार ४३ जना संक्रमितको अवस्था गम्भिर रहेको छ भने १ लाख ८८ हजार २७ जना उपचारपछि स्वस्थ्य पनि भएका छन् । 
अमेरिकामा कोरोना संक्रमणबाट सबैभन्दा बढी न्युयोर्क राज्य प्रभावित भएको छ । यहाँ अहिलेसम्म २४ हजार ९ सय ४४ जनाको ज्यान गएको छ । 
यस्तै अमेरिकाको दोस्रो प्रभावित राज्य न्यूजर्सीमा ७ हजार ९ सय ५१ जनाको मृत्यु भएको छ । यसैगरी मिचिगन राज्यमा ४ हजार १ सय ३५ जनाको मृत्यु भएको छ भने मासाचुसेट राज्यमा ४ हजार ९० जनाको मृत्यु भएको छ । 
यसैगरी अमेरिकाका लुसियाना, क्यालिफोर्निया, इलिनोइस, कनेक्टिकट, पेन्सिलभानिया, फलोरीडा जस्ता राज्यहरु कोरोना संक्रमणबाट बढी प्रभावित भएका छन् ।