दक्षिण एसियामा भारत कोरोनाको इपिसेन्टर बन्दै 

२३ बैशाख, हेटौंडा । विश्वभर महामारीको रुपमा फैलिरहेको कोरोना भाइरस कोभिड–१९ बाट दक्षिण एसियाली मुलुकमा भारत सबैभन्दा बढी प्रभावित भएको छ ।
कोरोना सम्बन्धि तत्थ्याङक प्रस्तुत गरिरहेको वेबसाइट वल्डोमिटरका अनुसार दक्षिण एसियाली देशहरुमा सबैभन्दा बढी संक्रमित र मृतकको संख्या भारतमा रहेको छ । 
भारतमा अहिलेसम्म १ हजार ५ सय ६६ जनाको मृत्यु भएको छ भने कुल संक्रमितको संख्या ४६ हजार ४ य ३७ पुगेको छ ।
सोमबार एकैदिन भारतमा झण्डै चार हजार संक्रमित फेला परेका छन् । संक्रमणबाट एकै दिन एक सय ७५ जनाको मृत्यु भएको छ । 
सोमबार भएको मृत्यु र संक्रमण भारतमा कोरोना देखिएयताकै सबैभन्दा उच्च हो । भारतमा सोमबार एकै दिन ३ हजार ९ सय ३२ जना नयाँ संक्रमित थपिएका छन् । 
यसैगरी भारतमा अहिलेसम्म १२ हजार ८ सय ४७ जना उपचारपछि निको भएर घर फर्किएका छन्  । भारतमा सबैभन्दा बढी संक्रमित महाराष्ट्रमा छन् । त्यसपछि गुजरात र नयाँ दिल्लीमा संक्रमितको संख्या बढी रहेको छ ।
दक्षिण एसियाली अर्को मुलुक पाकिस्तानमा कोरोनाबाट अहिलेसम्म ४ सय ७६ जनाको मृत्यु भएको छ भने कुल संक्रमितको संख्या २० हजार ९ सय ४१ रहेको छ । यसैगरी बंगलादेशमा १८२ जनाको ज्यान गएको छ भने कुल संक्रमित १० हजार ८ सय १ जना रहेका छन् ।
यस्तै श्रीलंकामा कोरोना संक्रमणबाट अहिलेसम्म ८ जनाको मृत्यु भएको छ भने ५ सय ५१ जना संक्रमित भएका छन् ।
मालदिभ्समा कोरोना संक्रमणबाट ५ सय ४१ जना संक्रमित भएका छन् भने अहिलेसम्म १ जनाको ज्यान गएको छ । 
दक्षिण एसियाली मुलुकहरु नेपाल र भुटानमा भने कोरोनाको संक्रमणबाट अहिलेसम्म कसैको पनि मृत्यु भएको छैन । 
नेपालमा कोरोना संक्रमितको संख्या ८२ पुगेको छ । नेपालमा अहिलेसम्म १६ जना उपचार पछि निको भएर घर फर्किएका छन् ।
यस्तै भुटानमा कोरोना संक्रमितको संख्या केही दिन यता निरन्तर स्थिर छ । यहाँ अहिलेसम्म ७ जनामा कोराना संक्रमण पुष्टि भएको । भुटानमा ५ उपचारपछि निको भएका छन भने २ जनाको उपचार चलिरहेको छ ।