कांग्रेसद्वारा नीजि क्षेत्रका समस्या समाधानमा सहयोग गर्ने प्रतिवद्धता

२४ बैशाख, काठमाडौं । नेपाली कांग्रेसले लकडाउनका कारण नीजि क्षेत्रमा परेको समस्या समाधानमा सहयोग गर्ने जनाएको छ । नेपाली कांग्रेस संघीय संसदीय दलले बुधबार कांग्रेस केन्द्रीय कार्यालयमा गरेको अन्तरक्रिया कार्यक्रममा सभापति देउवाले यस्तो प्रतिवद्धता व्यक्त गरेका हुन् । 
कार्यक्रममा बोल्दै देउवाले कोरोना संक्रमण रोक्न गरिएको लकडाउनका कारण देशको अर्थतन्त्रमा नकारात्मक असर परेको बताउँदै नीजि क्षेत्रलाई परेको समस्या समाधानका लागि संसदमा आवाज उठाउने बताए । यसअघि नै आफुले नीजि क्षेत्रलाई लक्षित गरेर प्याकेज ल्याउन सरकारसंग आग्रह गरेको भन्दै उनले संसदमा पनि आगामी बजेटमा ठोस प्याकेज घोषणाका लागि सरकारलाई दवाव दिने बताए । उनले व्याज दर घटाउनुपर्ने लगायतका नीजि क्षेत्रको माग बारे प्रधानमन्त्री र अर्थमन्त्रीलाई भेटेर कुरा गर्ने बताए । 
कार्यक्रममा उद्योग व्यवसायीले लकडाउनका कारण उद्योग व्यवसायीहरु ठूलो मारमा परेको र यसले देशको अर्थतन्त्रमा समेत नकारात्मक असर पर्ने भएकाले क्षति न्यूनिकरणको पहल गर्नुपर्नेमा जोड दिएका थिए । उनीहरुले व्याज मिनाह, सहुलियत ऋण, ऋण किस्ता भुक्तानीको समयावधी बढाउने लगायतका काम गर्नुपर्नेमा जोड दिएका थिए ।