कोरोना असर र बजेटमाथि निजि क्षेत्रसँग कांग्रेसको छलफल

२४ बैशाख, हेटौंडा । निजी क्षेत्रका उद्योगी व्यवसायीहरुले कोरोना भाइरसको संक्रमण रोकथामका लागि गरिएको लकडाउनको कारण उद्योग व्यवसायहरु बन्द भएको र यसले आर्थिक संकट निम्त्याएको बताएका छन् । 
नेपाली कांग्रेसले आर्थिक वर्ष २०७७÷०७८ को नीति, कार्यक्रम र बजेट सम्बन्धमा निजी क्षेत्रसँग गरेको छलफलमा भाग लिएका निजी क्षेत्रका प्रतिनिधिहरुलेयस्तो बताएका हुन् ।
नेपाली कांग्रेसले बुधबार पार्टी कार्यालय सानेपामा निजी क्षेत्रका विभिन्न छाता संगठनहरुको नेतृत्वसँग छलफल गर्दै उद्योगी व्यवसायीले दिएका सुझावहरुलाई संसद र सरकारसम्म लैजाने जनाएको छ ।
छलफलका क्रममा नेपाली कांग्रेसका सभापति शेरबहादुर देउवाले कोरोना भाइरस रोकथामका लागि लागू गरिएको लकडाउनपछि सिर्जना भएका व्यवसायीका समस्या र सुझावहरुलाई प्रधानमन्त्री र अर्थमन्त्रीलाई नै भेटेर कार्यान्वयनका लागि दबाब दिने बताएका छन् ।
छलफलमा सहभागि निजी क्षेत्रका प्रतिनिधिहरुले लकडाउनको विकल्प खोजिनुपर्ने, उद्योग कलकारखाना सञ्चालन गर्न दिनुपर्ने, बैंक ब्याजदर घटाउनुपर्ने, कर्जाको पुर्नतालिकिकरण गर्नुपर्ने र पर्यटन क्षेत्रलाई विशेष सुविधा दिनुपर्ने विषयमा दबाब दिन कांग्रेसलाई सुझाव दिएका छन् । 
छलफलमा उद्योग वाणिज्य महासंघका वरिष्ठ उपाध्यक्ष शेखर गोल्छा, होटल संघ नेपालकी अध्यक्ष सिर्जना राणा, नेपाल एसोसिएसन अफ टुर एण्ड ट्राभल एजेन्टस (नाटा)का अध्यक्ष अच्युत गुरागाईं, निर्माण व्यवसायी महासंघका अध्यक्ष रवि सिंह, नेपाल बैंकर्स संघका पूर्व अध्यक्ष ज्ञानेन्द्र ढुंगाना लगाएतको उपस्थिति रहेको थियो ।