लक डाउनको पूर्ण पालना गर्न सरकारको आग्रह

१ जेठ, हेटौंडा । कोरोना भाइरस समुदायस्तरमा फैलिनबाट रोक्न सरकारले सबैलाई लक डाउनको पूर्ण पालनाका लागि आग्रह गरेको छ । 
प्रतिनिधिसभाको शिक्षा तथा स्वास्थ्य समिति बैठकमा भएको छलफलमा भाग लिदै स्वास्थ्य तथा जनसंख्या मन्त्रालयका प्रवक्ता डा. विकास देवकोटाले समुदायस्तरमा कोरोना फैलिए अवस्था भयावह हुने भन्दै लक डाउनको पूर्ण पालना गर्न आग्रह गरे । 
नेपालमा १५ देखि ४५ वर्ष उमेरसमूहका व्यक्ति बढी संक्रमित रहेको र समुदायस्तरमा प्रवेश गरे जेष्ठ नागरिकमा संक्रमण फैलिने सम्भावना बढी हुने प्रवक्ता डा. देवकाटाले जानकारी दिए ।
विश्वका अन्य मुलुकमा जेष्ठ नागरिकमा संक्रमण बढी भएकाले मृत्युदरपनि बढी रहेको उल्लेख गर्दै उनले नेपालमा पनि जेष्ठ नागरिकमा संक्रमण फैलिए त्यही अवस्था हुने चेतावनी दिए । जेष्ठ नागरिकहरुमा रोगसँग लड्ने क्षमता कम हुने भएकाले समुदायस्तरमा कोरोना फैलिए नेपालमा पनि संक्रमितको मृत्यु हुने सम्भावना बढी हुने तर्फ उनले सचेत रहन सबैलाई आग्रह गरे ।
बैशाख महिनायता संक्रमणको ग्राफ बढ्दै गएको उल्लेख गर्दै प्रवक्ता देवकोटाले आउँदा दिनमा अझै संक्रमित बढ्न सक्ने बताए । भारतबाट आएकाहरुबाट कोरोना संक्रमण बढेको उनको भनाई छ ।
प्रवक्ता देवकोटाका अनुसार विशेषगरी भारतको उत्तरप्रदेश, उत्तराखण्ड मुम्बै र दिल्लीबाट नेपाली नागरिक स्वदेश भित्रिएका छन् ।