मकवानपुरका कोरोना संक्रमित काठमाडौं बस्थे : प्रजिअ

२ जेठ, हेटौंडा । कोरोना संक्रमण पुष्टि भएका मकवानपुरका ३७ बर्षीय पुरुष काठमाडौं बस्ने गरेको मकवानपुरका प्रमुख जिल्ला अधिकारीले बताएका छन् । प्रष्टखबरसंगको कुराकानीमा प्रमुख जिल्ला अधिकारी दिपकराज नेपालले उनको ठेगाना मकवानपुर भएपनि उनी काठमाडौंमा बसोबास गर्ने गरेको बताएका हुन् ।
उनले स्वाब (खकार) नमूना संकलन पनि काठमाडौंमा नै गराएको बताउँदै प्रमुख जिल्ला अधिकारी नेपालले अहिले नै जिल्लाबासी आत्तिनु पर्ने अवस्था नरहेको बताए । ‘सर्तक हुनु जरुरी छ तर आत्तिनु पर्दैन ।’–उनले भने । संक्रमित पुरुषले आफु लकडाउनको अवधीमा घर नआएको बताएको प्रमुख जिल्ला अधिकारी नेपालले जानकारी दिए । उनका अनुसार स्वास्थ्यकर्मीहरुको टोलीले उनको परिवार र अन्य व्यक्तिसंग थप जानकारी लिईरहेको छ । आवश्यकता अनुसार थप प्रक्रिया अघि बढाउने उनले बताए । 
एक स्वास्थ्यकर्मीले मकवानपुरबाट स्वाब नमूना संकलन गरिएका कसैलाई पनि अहिलेसम्म कोरोना संक्रमण नरहेको प्रष्ट पारे । उसो त बीरगंजमा कोरोना संक्रमण देखिएका एक पत्रकारको पनि ठेगाना मकवानपुर नै हो । ‘त्यो अवस्थामा मकवानपुरमा कोरोना संक्रमित भेटियो भन्न मिल्दैन, उनको ठेगाना मात्रै मकवानपुर हो, बसोबास चै जिल्ला बाहिर रहेको अवस्था हो ।’–ति स्वास्थ्यकर्मीले भने ।