नीति तथा कार्यक्रममाथि संशोधन पेश गर्ने कांग्रेसको तयारी

४ जेठ, हेटौंडा । प्रमुख प्रतिपक्षी दल नेपाली काँग्रेसले नेपाल सरकारद्वारा यही जेठ २ गते संघिय संसद्को संयुक्त बैठकमा प्रस्तुत नीति तथा कार्यक्रम माथी संसोधन पेश गर्ने भएको छ ।
कांग्रेसले सरकारले प्रस्तुत गरेको नीति तथा कार्यक्रमले विद्यमान चुनौतीको सम्बोधन गर्न नसक्ने र जनताप्रति उत्तरदायी नरहेको भन्दै संशोधन पेश गर्ने जनाएको छ ।
काँग्रेस संसदीय दलको शनिवार बसेको बैठकले नीति तथा कार्यक्रमले कोरोना भाइरसबाट प्रतावित जनतालाई आशा र भरोसा पनि दिलाउन नसकेको निष्कर्ष निकाल्दै संशोधन पेश गर्ने निर्णय गरेको हो ।
काँग्रेस सभापति एवं संसदीय दलका नेता शेरबहादुर देउवाको अध्यक्षतामा बसेको बैठकले विश्व महामारीका रुपमा रहेको कोरोना भाइरसको रोकथाम, न्यूनीकरण र संक्रमितको उपचारलाई प्राथमिकता दिदै नीति तथा कार्यक्रम संसोधन हुनुपर्ने निर्णय गरेको छ ।
यस्तै बैठकले जारी लकडाउनको अवस्थामा मजदूर तथा श्रमिक, किसान, अध्ययनको सिलसिलमा घरभन्दा टाढा रहेका विद्यार्थी, अन्य रोगबाट ग्रसित बिरामी एवं दीर्घ रोगी, शारीरिक अशक्त तथा असहाय व्यक्तिले पीडा झेल्नु परिरहेको भन्दै उनीहरुको जीवनयापनका लागि समुचित राहत प्याकेजको घोषणा  गर्न पनि सरकारसँग माग गरेको छ । 
यसैगरी बैठकले भारतद्वारा नेपाली भूमिको अतिक्रमण हुँदा समेत आफ्नो भूमिको रक्षाका लागि सरकार संवेदनशील नरहेको र ठोस कदम चाल्न नसकेको टिप्पणी गर्दै अविलम्ब कूटनीतिक प्रयास गरी नेपालको भूमिको रक्षा गर्न सरकारसँग माग गरेको छ ।