राष्ट्रियसभा: सत्ता पक्ष र प्रतिपक्ष बिच जुहारी

५ जेठ, हेटौंडा । राष्ट्रियसभाकोे बैठकमा सत्तापक्षका सांसदहरुले सरकारको नीति तथा कार्यक्रमको बचाउ गरेका छन् भने विपक्षी दलले सुधारको माग गरेका छन् ।
सोमबारको राष्ट्रियसभाको बैठकमा आगामी बर्षका लागि सरकारको नीति तथा कार्यक्रममाथिको छलफलमा सहभागी हुदै सत्तापक्षका सांसदहरुले नीति तथा कार्यक्रमको स्वागत गरेका छन् ।
उनीहरुले मुलुकको आवश्यकता अनुसार कार्यक्रम आएको भन्दै सरकारको बचाउ गरेका छन् । तर विपक्षी दलका सांसदहरुले भने कोरोनाले प्रभावित भएको जनताको जनजीवन उकास्ने तथा शिथिल बनेको अर्थतन्त्र उकास्ने कार्यक्रम आउन नसकेको भन्दै सुधारको आवश्यकता औल्याएका छन् ।
नेकपाका राष्ट्रियसभा सदस्य खिमलाल भट्टराईले नीति र कार्यक्रम सामुहिक रुपमा प्रस्तुत भएको,राष्ट्रको आवश्यकता तथा जनताको चाहाना र सपनालाई सम्बोधन गरेको भन्दै सरकारको बचाउ गरे ।
सरकारले यसअघि भनेको र देखाएको सपना पुरा गरेको भन्दै उनले नेपाल सरकार अग्नि परीक्षामा खरो उत्रिएको दाबी गरे ।
सरकारले कयौ विकास निर्माणका काम संगै समाजवाद प्रति प्रतिवद्धता जनाएको, राष्ट्रिय स्वाधिनताको पक्षमा बोलेको भन्दै नीति तथा कार्यक्रमको प्रशंम्सा गरे ।
नेपाली कांग्रेसकी राष्ट्रियसभा सदस्य तारादेवी भट्टले लकडाउनपछि शिथिल बनेको अर्थतन्त्र उकास्ने किसिमका आर्थिक पुर्नसंरचनाको कार्यक्रम ल्याउन नसकेको टिप्पणी गरीन।
नीति तथा कार्यक्रममा समावेश गरिएका कार्यक्रमले भ्रष्टाचारलाई बढाउने त होइन भन्ने प्रसस्त आधार देखिएको भन्दै उनले शहरकेन्द्रीत नभई स्थानीय निकायलाई शक्तिशाली बनाउने तर्फ बजेट केन्द्रीत गर्नुपर्ने धारणा राखीन।
कृषि उत्पादनलाई दोब्बर बनाउने भनिएपनि मलखाद तथा सिंचाईको व्यवस्था मिलाउने तर्फ कार्यक्रम समावेश नभएको, श्रमिक बजारको लिस्ट बनाउने भनिएको भएपनि श्रमलाई नीतिमा रुपान्तरण कसरी गर्ने भन्ने दृष्टिकोण नआएको बताइन् ।
लकडाउनका कारण सर्वसाधरणको दैनिकी संगै मुलुकको आर्थिक क्षेत्र नराम्रोसंग प्रभासिवत भएको भन्दै उहाँले तत्काल राहत प्याकेज तथा आर्थिक पुर्नसंरचनाको प्याकेज ल्याउनुपर्नेमा जोड दिइन ।
छलफलमा नेकपाका राष्ट्रियसभा सदस्य जगप्रसाद शर्मा, राष्ट्रियसभा सदस्य दिल कुमारी रावल लगाएतले भाग लिएका थिए । फोटो: गुगल