नेपालको नयाँ नक्सा स्वीकृत

६ जेठ, हेटौंडा । सरकारले लिम्पियाधुरा, लिपुलेक र कालापानी  सहितको नेपालको नयाँ नक्सा स्वीकृत गरेको छ । 
सोमबार बसेको मन्त्रिपरिषद् बैठकले लिपुलेक, लिम्पियाधुरा र कालापानी समेटिएको नक्सा स्वीकृत गरेको हो । 

नयाँ नक्सामा भारतले अतिक्रमण गरेको लिपुलेक, लिम्पियाधुरा र कालापानीको क्षेत्र समेटिएपछि नेपालको कुल क्षेत्रफलमा परिवर्तन भएको छ ।

यसअघिको १ लाख ४७ हजार १ सय ८१ वर्गकिलोमिटर मा ३ सय १० वर्गकिलोमिटर भूभाग थपिएको छ । अब नेपालको वास्तविक क्षेत्रफल १ लाख ४७ हजार ४ सय ९१ वर्गकिलोमिटर नक्सामा समावेश भएको छ ।
मन्त्रिपरिषद बैठकका निर्णय सार्वजनिक गर्न आयोजना गरिएको पत्रकार सम्मेलनमा सरकारका प्रवक्ता डा. युवराज खतिवडाले भूमि, व्यवस्था, सहकारी तथा गरिबी निवारणमन्त्रालयले प्रस्ताव गरेको नेपालको अद्यावधिक नक्सा स्वीकृत गरिएको जानकारी दिए । 
नयाँ नक्सामा नेपाली भूमि लिपुलेक, कालापानी र लिम्पियाधुरा समेटिएको र अन्य अन्तर्राष्ट्रिय सीमाहरु यथावत रहेको मन्त्री खतिवडाले बताए ।
अबका दिनमा निशान छाप, सरकारी कामकाज र विद्यालय लगायत सम्पूर्ण क्षेत्रमा उद्यावधिक नक्सा नै प्रयोग हुने पनि मन्त्री खतिवडाले जानकारी दिए । 
यसअघि भारतले गत नोभेम्बरमा जारी गरेको आफ्नो नयाँ राजनीतिक नक्सामा नेपाली भूमि लिम्यिाधुरा समेटेको थियो । पछिल्लो समय नेपाली भूमि हुँदै चीनको मानसरोबरसम्म जाने सडक निर्माण गरेपछि त्यसको चर्को विरोध भएको थियो ।
पत्रकार सम्मेलनमा अर्थमन्त्री समेत रहेकाका प्रवक्ता खतिवडाले निश्चित समयमै आगामी आर्थिक वर्षको बजेट आउने जानकारी दिए । 
एक महिना अघि गरिएको आर्थिक क्षेत्रको अनुमान फरक पर्दै गएको उल्लेख गर्दै उनले एक दुई दिन भित्रै बजेटको आकार तयार हुने र अर्थतन्त्रलाई कसरी उकास्न सकिन्छ भन्ने कुरा पनि टुंगो लाग्ने बताए ।