नीति तथा कार्यक्रम पुर्नलेखन गर्नुपर्ने अधिकारीको माग

६ जेठ, हेटौंडा । सरकारले आगामी बर्षका लागि प्रस्तुत गरेको नीति तथा कार्यक्रम माथिको छलफल आज मंगलबार पनि जारी छ ।
छलफलका क्रममा प्रमुख प्रतिपक्षी दल नेपाली कांंग्रेसका राष्ट्रियसभाका संसदीय दलका नेता राधेश्याम अधिकारी ले सरकारको नीति तथा कार्यक्रम वर्तमान संकट समाधान गर्ने दृष्टिले अपुरो भएकाले पुर्नलेखन गर्नुपर्ने माग गरेका छन् ।
उनलेे कोरोना विरुद्धको महामारी रोकथाम तथा नियन्त्रण र आर्थिक संकट समाधानका लागि सबै दलहरुबीच राष्ट्रिय एकता हुनुपर्नेमा आफुहरुको विमति नभएको भन्दै अपुरो दस्तावेजलाई पुरा गर्न मात्रै माग गरेको बताए ।
मौलिक अधिकारका कानुन कार्यन्वयन हुन नसकेको भन्दै उनले लोकतन्त्रमा नागरिकको अधिकार प्रत्याभुति हुन नसकिरहेको कुरा सरकारले स्वीकार गर्नसक्नुपर्ने बताए।
स्थानीय सरकारलाई दिनुपर्ने एकल अधिकार नदिएकाले स्थानीय सरकारको गुनासो संघीय सरकारप्रति बढ्दै गएको भन्दै ती विषयलाई पनि सरकारको नीति तथा कार्यक्रमले समावेश गर्न नसकेको नेता अधिकारीले टिप्पणी गरे ।
यस्तै नेता अधिकारीले सरकारले समानुपातिक समावेशी सिद्धान्तलाई अनुसरण गर्न नसकेको, राजनीतिक विचलनमा सरकार खरो उत्रन नसकेको , कोभिड १९ संक्रमणको स्थितिको प्रक्षेपण गर्न नसकिएको ,भेन्टिलेटर लगायतका स्वास्थ्यतयारी गर्न नसकेको आरोप पनि लगाए ।
उनले संक्रमणको दृष्टिले जोखिमपुर्ण क्षेत्रमा स्वास्थ्य सामाग्री नपुग्नु, महामारीको समयमा किनेको सामानमा आर्थिक अनियमितता हुनु, शिक्षामा योजना नआउनु, रेमिट्यान्स लगायत कृषि उत्पादन वृद्धिको योजना नहुनु लगायतले नीति तथा कार्यक्रम पुर्ण हुन नसकेको बताए ।  
उनले भारतीय सिमामा अलपत्र परेका नेपाली माथि सरकारले समान व्यवहार नगरेको भन्दै तत्काल देश भित्र्याएर उनीहरुको उचित ब्यबस्थापन गर्न माग गरे ।