नीति तथा कार्यक्रम मुलुकको आवश्यकता अनुकुल: शर्मा

६ जेठ, हेटौंडा । राष्ट्रियसभाको मंगलबारको बैठकमा आफ्नो धारणा राख्दै राष्ट्रियसभाका लागि नेकपा संसदीय दलका नेता दिनानाथ शर्माले सरकारको नीति तथा कार्यक्रम समय सापेक्ष र मुलुकको आवश्यकता अनुकुल रहेको बताएका छन् ।
उनले राष्ट्रिय आवश्यकता, सोचाईको धरातल र उचाईका आधारमा सरकारको नीति तथा कार्यक्रम केही ठूलो र विस्तृत भएको बताए । उनले लोकतान्त्रिक मुल्य मान्यताको वस्तुगत धरातल, वर्तमान आवश्यकतालाई संम्बोधन, समाजवाद उन्मुख, राष्ट्रिय हित, राष्ट्रिय स्वभिमान र सार्वभौमसत्तालाई आत्मसाथ गरेकाले नीति तथा कार्यक्रम समय सापेक्ष र मुलुकको आवश्यकता अनुकुल भएको दाबी गरे ।
नीति तथा कार्यक्रमको बुँदा नम्बर २६९ मा उल्लेख गरिएको प्रतिवद्धता अनुसार सरकारले नयाँ नक्सा जारी गरेर  आफ्नो प्रतिवद्धता सम्बोधन गरेको भन्दै उनले सरकारको बचाउ गरे ।
लोकतन्त्र दर्शन र सिद्धान्त मात्रै नभई जीवन व्यवहार भएकाले नीति तथा कार्यक्रमले जीवन व्यवहारलाई सम्बोधन गरेको उनको दाबी छ ।
नेता शर्माले सरकारले गरेको प्रतिबद्धता अनुसार नै कोरोना महामारीको रोकथाम तथा नियन्त्रण र महामारीबाट प्रभावित सामाजिक आर्थिक क्षेत्रहरुलाई पुनर्जीवन दिई विकास निर्माणलाई तिब्रता दिने विश्वास ब्यक्त गरे ।
उनले सरकारको नीति तथा कार्यक्रमका विपक्षमा विचार राखेर प्रतिपक्षले धर्म निर्वाह गरेको टिप्पणी गर्दै नीति तथा कार्यक्रमलाई पुर्नलेखन गर्नुपर्छ भन्नु निषेधको राजनीति भएकाले प्रतिपक्षी दललाई संशोधन प्रस्ताव फिर्ता लिन आग्रह पनि गरे ।