भ्रम सिर्जना भयो, कोरोना संक्रमितको सबै ठेगाना खुलाउनु : सूचना आयोग

६ जेठ, काठमाडौँ । स्वास्थ्य तथा जनसंख्या मन्त्रालयले कोरोना संक्रमित र मृत्यु भएकाहरु स्पष्ट ठेगाना नदिंदा भ्रम फैलिरहेको अवस्था सबै ठेगाना खुलाउन राष्ट्रिय सूचना आयोगले निर्देशन दिएको छ । मन्त्रालयले पत्रकार सम्मेलन गर्दा कहिले जिल्लामात्रै, महिला वा पुरुष, उमेर समेत अस्पष्ट ढंगले बताउन थालेपछि समाजमा भ्रम र त्रास फैलिएको थियो । 
आयोगले कोरोना भाइरसबाट संक्रमित र मृत्यु भएकाहरुको दुवै ठेगाना सार्वजनिक गर्न स्वास्थ्य तथा जनसंख्या मन्त्रालयलाई निर्देशन दिएको छ । मन्त्रालयले संक्रमित वा मृत्यु भएकाको स्थायी ठेगानामात्रै सार्वजनिक गर्दा संक्रमणको जोखिम बढाएको भन्दै आयोगले अस्थायी र स्थायी दुवै ठेगाना खुलाउन निर्देशन दिएको हो । 
कोरोना संक्रमित वा मृत्यु भएकाको स्थायी ठेगाना र अहिले बसोबास गरिरहेको स्थान वा संक्रमण हुँदाको ठाउँ फरक हुन सक्ने र एउटामात्रै स्थानका बारेमा उल्लेख गर्दा सर्वसाधारणमा भ्रम तथा अन्योल भएको पाइएकोले त्यसरी यसरी प्रवाह भइरहेको सूचनामा थप स्पष्ट गराउन आवश्यक रहेको आयोगले जनाएको छ ।
केहि दिन अघि मन्त्रालयले मकवानपुर निवासी एकजनामा कोरोना भएको उल्लेख गरेपनि उनी मकवानपुरमा बसोबास गर्ने नभई अन्यत्र बसोबास गर्दै आएका थिए । यसरी मकवानपुर मात्रै उल्लेख हुँदा मकवानपुरमा त्रास फैलिएको थियो । तर पछि उनी जिल्लामै बसोबास गर्ने नगरेको पत्ता लागेको थियो ।