अख्तियारको कार्यक्षेत्रमा निजी क्षेत्रलाई नपार्न विज्ञहरुको जोड

सांकेतिक फोटो

९ जेठ, हेटौंडा । भष्ट्राचार निवारण सम्बन्धी विधेयकमा निजी क्षेत्र पनि अख्तियारको कार्यक्षेत्र भित्र पर्ने विषयलाई विज्ञ तथा सांसदहरुले विरोध गरेका छन् ।
संघीय संसद राष्ट्रिय सभा अन्तर्गतको विधायन व्यवस्थापन समितिको बिहीबारको बैठकमा उपस्थित विज्ञ तथा सांसदहरुले निजी क्षेत्रलाई निरुत्साहित गर्ने गरी कानून ल्याउन नहुने बताएका हुन् । 
कानून आयोगका अध्यक्ष माधव पौडेलले निजी कम्पनीहरुलाई  अख्तियारको क्षेत्राधिकार भित्र पर्नेगरी कानून निर्माण गर्न नहुने बताए । 
उनले सबै निजी कम्पनीहरुलाई भष्ट्राचारको दायरा भित्र राखेर अख्तियारको कार्यक्षेत्र भित्र पर्ने गरी कानून निर्माण गर्न नहुने उल्लेख गर्दै चरणवद्ध रुपमा विभिन्न क्षेत्रलाई भष्ट्राचारको दायरामा ल्याउन सकिने बताए ।
सांसद राधेश्याम अधिकारीले नेपालमा सबैभन्दा पारदर्शी रुपमा बैंक तथा वित्तीय संस्था, बीमा कम्पनी र निजी कम्पनीहरुले काम गरिरहेको उल्लेख गर्दै अख्तियारको अधिकार क्षेत्रभित्र पर्नेगरी कानून निर्माण गर्न नहुने बताए ।
उनले अख्तियारलाई हस्तक्षेप गर्न दिई नियमनकारी निकायलाई कमजोर बनाउन नहुने तर्फ जोड दिए । उनले विभिन्न क्षेत्रलाई नियमन तथा अनूगमन गर्न नियामक निकायहरु बनाइएकाले अख्तियारको हस्तक्षेप हुन नहुने स्पष्ट पारे ।
छलफलमा सांसदहरु ठगेन्द्र प्रसाद पुरी, बिमला राई पौडेल, कानून न्याय तथा संसदीय मामिला मन्त्रालयका सहसचिव धनराज ज्ञवाली, लगाएतकाले आ–आफनो धारण राखेका थिए ।