कोरोनाबाट मर्नेको संख्या ३ लाख ३४ हजार नाघ्यो

९ जेठ, हेटौंडा । विश्वभर महारामारीको रुपमा फैलिरहेको कोरोना भाइरस (कोभिड–१९) बाट मर्नेको संख्या ३ लाख ३४हजार नाघेको छ । 
कोरोना भाइरसको तत्थ्याङक सार्वजनिक गरिरहेको वेवसाइट वल्डोमिटरका अनुसार अहिलेसम्म कोरोना संक्रमणका कारण मर्नेको संखया ३ लाख ३४ हजार १ सय १९ पुगेको छ । पछिल्लो २४ घण्टामा संक्रमणबाट ४ हजार ८ सय ८० जनाको मृत्यु भएको छ । 
यस्तै अहिलेसम्म कोरोना संक्रमणबाट विश्वभर कुल ५१ लाख ८९ हजार ५ सय ६४ जना मानिस संक्रमित भएका छन् । २४ घण्टाको अवधिमा १ लाख ६ हजार १ सय ५३ जना मानिस नयाँ संक्रमितको रुपमा थपिएका छन् ।
पछिल्लो तथ्यांक अनुसार २० लाख ७८ हजार ६ सय ३१ जना संक्रमित उपचारपछि निको भएका छन् । यस्तै भाइरसको संक्रमणका कारण अहिले ४५ हजार ६ सय ३५ जना गम्भीर अवस्थामा उपचार गराइरहेका छन् भने २७ लाख ३१ हजार १स य ७९ जनाको अवस्था मध्यम रहेको छ । 
कोरोनाको संक्रमणबाट सबैभन्दा बढी मानिसको मृत्यु भएको अमेरिकामा अहिलेसम्म ९६ हजार ३ सय ४१ जनाको मृत्यु भएको छ । पछिल्लो २४ घण्टामा अमेरिकामा १ हजार ४ सय ५ जनाको मृत्यु भएको छ । 
अमेरिकापछि संक्रमणबाट मृत्यु हुने देशमा बेलायत दोश्रो स्थानमा छ । यहाँ कोरोना संक्रमणबाट ज्यान गुमाउँनेको संख्या ३६ हजार ४२ पुगेको छ । यहाँ २४ घण्टाको अवधिमा ३ सय ३८ जनाको मृत्यु भएको छ । 
यसैगरी इटलीमा कोरोना संक्रमणबाट ज्यान गुमाउँनेको संख्या ३२ हजार ४ सय ८६ पुगेको छ । यहाँ  २४ घण्टामा १ सय ५६ जनाको मृत्यु भएको छ ।
यस्तै कोरोनासंग जुधिरहेको अर्को यूरोपेली मुलुक स्पेनमा ज्यान गुमाउनेको संख्या २७ हजार ९ सय ४० पुगेको छ । यहाँ थप ५२ जनाको मृत्यु भएको छ । यसैगरी फ्रान्समा संक्रमणबाट मृत्यु हुनेको संख्या २८ हजार २ सय १५ छ । 
पछिल्लो समय दक्षिण अमेरिकि मुलुक ब्राजिलमा कोरोनाको संक्रमण र मृत्यु दर दुबै बढेको छ । यहाँ अहिलेसम्म २० हजार ४७ जनाको मृत्य भएको छ भने संक्रमितको संख्या ३ लाख १० हजार ८७ पुगेको छ । ब्राजिलमा पछिल्लो २४ घण्टामा १६ हजार ७ सय ३० जना संक्रमित थपिदा १ हजार १ सय ५३ जनाको मृत्यु भएको छ ।
यसैगरी कोरोना भाइरसको संक्रमणबाट अहिलेसम्म रसिया बेल्जियम, जर्मनी, इरान, नेदरल्याण्डस, क्यानडा, टर्की, स्वेडेन, मेक्सिको, स्विटजरल्याण्ड जस्ता देशहरु बढी प्रभावित भएका छन् ।