परीक्षण नगरी जोखिम मोलेर बागमतीको प्रदेशसभा संचालन गरिंदै

९ जेठ, हेटौंडा । बागमती प्रदेशको प्रदेशसभा बैठक कोरोना परीक्षण नगरी जोखिम मोलेर संचालन गरिने भएको छ । जेठ १२ गतेका लागि बोलाईएको बैठक संचालनका लागि भएको कार्याव्यवस्था परामर्श समितिको बैठकमा सरकारतर्फबाट मन्त्रीहरुले कोरोना परीक्षण गर्नु नपर्ने धारणा राखेपछि जोखिम मोलेर प्रदेशसभा संचालन हुन लागेको हो । 
बैठकमा सहभागी एक सांसदका अनुसार बैठकमा उपस्थित आन्तरिक मामिला तथा कानून मन्त्री शालिकराम जम्कट्टेल र सामाजिक विकास मन्त्री युवराज दुलालले त्यस्तो धारणा राखेपछि कोरोना परीक्षण विनै बैठक संचालन हुने देखिएको छ । उनीहरुले परीक्षण गरेको भोलीपल्ट पनि कोरोना संक्रमणको जोखिम बढ्ने भन्ने ढंगको अभिव्यक्ति दिएको परामर्श समितिका ति सदस्यले बताए ।
‘हामीले पिसिआर परीक्षणका लागि लेखेर पठाएका छौं ।’–प्रदेशसभाका सचिव कृष्णहरी खड्काले भने–‘मूख्यमन्त्री लगायतसंग यसबारे परामर्श भईरहेको छ, निर्णय आएको छैन ।’ कोरोना परीक्षण नगर्दा जोखिम बढ्ने सांसदहरुको भनाई छ । कतिपय सांसदले नै संसद सचिवालयमा फोन गरेर कोरोना परीक्षण विना बैठक संचालन गर्दा आफुहरु उपस्थित नहुने जनाएको सचिवालय स्रोतको भनाई छ । जोखिम मोलेर बैठकमा आउन नसक्ने उनीहरुले बताएका छन् । 
‘परीक्षण गर्दा पनि केही दिन अघि नै समय दिनुपर्छ, अहिलेसम्म कुनै जानकारी आएकाले हामी अन्यौलमा छौं ।’–एक सांसदले भने । बागमती प्रदेशका केही जिल्लाबाहेक अधिकांश जिल्लामा कोरोना संक्रमण देखिएको अवस्थामा जोखिम मोल्नु मुर्खता हुने उनीहरुको भनाई छ । प्रदेशसभा बैठक संचालन हुन लागेको अन्य प्रदेशमा कतै आरडिटि त कतै पिसिआर परीक्षण गरिएको छ । संघीय संसदमा समेत सांसद, कर्मचारी र त्यहाँ प्रवेश गर्नेहरु सबैको परीक्षण गरिएको थियो ।