सरकारले नै जनतामा आक्रोश बढायो : बानियाँ

२० जेठ, हेटौंडा । बागमती प्रदेश प्रमुख प्रतिपक्ष दल नेपाली कांग्रेसका नेता इन्द्रबहादुर बानियाँले सरकारले नै जनतामा आक्रोश बढाउने काम गरेको बताएका छन् । 
उनले लकडाउनलाई पुरानै शैलीमा निरन्तरता दिएर जनतामा आक्रोश बढाउने काम सरकारले गरेको बताएका हुन् । एक टेलिभिजन अन्तरवार्तामा उनले कोरोना संक्रमण बढि रहेको क्षेत्रमा कडाई गर्दै अन्य क्षेत्रमा लकडाउनलाई खुकुलो बनाउँदै व्यस्थित गर्नुपर्नेमा जोड दिनुपर्ने दिए । सरकार कठोर बनेपनि निमर्म हुन नहुने भन्दै उनले दैनिक ज्यालादारी गर्ने श्रमिक र विपन्न वर्गलाई तत्काल नगद उपलव्ध गराएर आवश्यक राहतको जोहो गर्ने व्यवस्था मिलाउनुपर्ने बताए । 
उद्योगी व्यवसायी मर्कामा परेपनि सरकारले यसबारे पूर्ण रुपमा वेवास्ता गरिरहेको उनको भनाई छ । उनले उद्योगी, व्यवसायी, गरिब, किसान, मजदुर सबैको हित हुने खालको बजेट आउनुपर्नेमा कम्युनिष्ट सरकारले यसलाई उपेक्षा गर्दै निमर्म बनेको बताए । यसको मूल्यांकन जनताले भविष्यमा गर्ने उनको भनाई थियो । उनले राष्ट्रियताको पक्षमा सरकारसंग कांग्रेस एकमत रहेको बताउँदै भुमी फिर्ता ल्याउन सरकारले गर्ने वार्तामा कांग्रेस संगसंगै रहने बताए ।