कैलाश गाउँपालिकामा आगलागीको निष्पक्ष छानविन गर्न कांग्रेसको माग, एकपक्षीय समिति अस्विकार

२० जेठ, हेटौंडा । नेपाली कांग्रेसले मकवानपुरको कैलाश गाउँपालिकाको कार्यालयमा जेठ १५ गते भएको आगलागीको निष्पक्ष छानबिनको माग गरेको छ । कांग्रेस क्षेत्रीय समितिद्वारा विज्ञप्ति जारी गर्दै आगलागीबाट गाउँपालिकाको कार्यालयमा रहेका विभिन्न महत्वपूर्ण कागजात तथा फर्निचरहरु जलेर नष्ट भएकोमा कांग्रेस मकवानपुर प्रतिनिधिसभा २ (ख) (साविक मकवानपुर क्षेत्र नं. ४) ले दुःख व्यक्त गर्दै निष्पक्ष छानविनको माग गरेको हो ।
विज्ञप्तिमा 'गाउँपालिकाको कार्यालयमा एक्कासी आगलागी हुँदा स्थानीय जनताहरु गाउँपालिकाबाट पाउने अत्यावश्यक सेवासुविधा लिनबाट बञ्चित भएका छन् । स्थानीय जनताहरुलाई गाउँपालिकाबाट तत्काल अत्यावश्यक सेवासुविधा प्रदान गर्न' माग गरिएको छ ।
गाउँपालिकाको कार्यालयमा आगलागीबाट करोडौंको क्षति भएको र गाउँपालिकाले उपाध्यक्ष सुकुमाया थिङको संयोजकत्वमा ७ सदस्यीय छानविन समिति गठन गरेको भन्दै एक पक्षीय रुपमा गठन गरिएकोमा नेपाली कांग्रेस प्रतिनिधिसभा २ (ख) (साविक मकवानपुर क्षेत्र नं. ४) का सभापति लोकबहादुरले मुक्तानले विज्ञप्तिमा गम्भीर ध्यानाकर्षण भएको जनाएका छन् ।
विज्ञप्तिमा 'घटना के कसरी भएको हो ? सत्यतथ्य छानविन गर्नलाई नेकपामा आवद्ध नेता कार्यकर्ता मात्रै छानविन समितिमा रहेकाले निष्पक्ष छानविन हुनेमा शंका रहेको छ । कैलाश गाउँ कार्यपालिकाले स्थानीय राजनीतिक दलहरुलाईसमेत बेवास्ता गर्दै नेकपा निकट नेता कार्यकर्ताहरु मात्रै सम्मिलित छानविन समिति बनाउँदा सत्यतथ्य बाहिर नआउने देखिएकाले तत्काल सम्बन्धित निकायहरु सम्मिलित विश्वसनीय उच्चस्तरीय छानविन समिति गठन गर्न' माग गरिएको छ ।