विश्व साइकलयात्रामा निस्किएका हेटौंडाका भारतीसहितको टोली म्यान्मारबाट फर्कियो

२३ जेठ, हेटौंडा । नेपाललाई चिनाउन फागुन ७ गते हेटौंडाबाट विश्व साइकलयात्रामा निस्किएका हेटौंडाका विक्रम भारतीसहितको टोली शुक्रबार स्वदेश फर्किएको छ ।
उनीसँगै साइकलयात्री चितवन गैंडाकोटका बिमल गिरी र कैलालीका छत्र रावल पनि फर्किएका छन् । सरकारले विदेशमा अप्ठ्यारोमा परेका नेपालीलाई उद्धार गर्ने निर्णय गरेपछि म्यानमारमा रहेका उनीहरु अन्य देशमा रहेका भन्दा पहिले स्वदेश फर्किन पाउने भाग्यमानी बनेका थिए ।
कोरोना भाइरसका कारण भएको लकडाउनले विदेशमा फसेका नेपालीको उद्धार गर्ने क्रममा उनीहरुसहित नेपाली स्वदेश म्यान्मारबाट फर्किएको हो । नेपाल आएको टोलीमा म्यानमारमा रहेका नेपाली विद्यार्थी, पर्यटक तथा व्यबसायी रहेको जनाइएको छ । भारतीको टोली ४ हजार १ सय किलोमिटर दुरी पूरा गरी म्यानमार पुगेको थियो । म्यानमार पुगेपछि कोरोना महामारीका कारण उनीहरु म्यानमारको रंगुनमा थिए ।
भारतीले कोरोना महामारी सकिएपछि आफूको साइकलयात्रा जारी रहने बताए । झण्डै १० महिनामा १३ राष्ट्र घुमिसक्ने लक्ष्यसहित उनीहरुले यात्रा शुरू गरेका थिए ।
उनीहरुले पहिलो चरणमा हेटौंडाबाट भारत हुँदै, बंगलादेश, म्यानमार, लाओस, थाइल्याण्ड, मलेसिया, सिंगापुर, इन्डोनेसिया, टिमोर लेस्टे, जापान र कोरिया यात्रा गर्ने लक्ष्य बनाएका थिए ।
(न्युजअफनेपालबाट)