मेयरमा अघि लाग्यो कांग्रेस

७ जेठ, हेटौँडा । स्थानीय तह निर्वाचनमा आइतबार हेटौँडा उपमहानगरपालिकामा नेपाली कांग्रेसले अग्रता लिएको छ ।  आइतबार दिउँसो उपमहानगरपालिकाको  १२ वटा वडाको मत परिणाम सार्वजनिक हुँदा नेपाली कांग्रेसका मेयर पदका उम्मेदवार अगाडि लागेका छन् । नेपाली कांग्रेस र माओवादी केन्द्रको संयुक्त प्यानलबाट नेपाली कांग्रेसका मेयर उम्मेदवार आनन्दराम पराजुलीले १४ हजार ७ सय १९ मत ल्याएर अघि लागेका छन् । पराजुलीलाई पछ्याईरहेका नेकपा एमालेका तर्फबाट मेयरका उम्मेदवार हरि बहादुर महतले १४ हजार ४ सय ८८ मत ल्याएका छन् । शनिबार महत दिनभर अघि रहेका थिए भने आइतबार पराजुली अघि लागेका छन् । राप्रपाका तर्फबाट मेयरका उमेदवार मधु अधिकारीले ४५ सय ९७ मत प्राप्त गरेका छन् ।
उपमेयरमा भने नेकपा एमालेकी उम्मेदवार मिना अगाडि छिन् । मतगणना शुरु भएदेखि अग्रता लिईरहेकी उनले यसलाई निरन्तरता दिईरहेकी छिन् । आइतबार दिउसोसम्ममा उनले १४ हजार ५ सय ९ मत प्राप्त गरेकी छिन् भने प्रतिष्पर्धी माओवादी केन्द्रका बलराम बलले १० हजार ८ सय ३० मत प्राप्त गरेका छन् । राप्रपाका तर्फबाट उपमेयरका उम्मेदवार ईन्दिरा न्यौपानेले ५ हजार २ सय ७७ मत प्राप्त गरेकी छिन् । अहिलेसम्म हेटौँडा वडा नम्बर १, २, ३, ४, ५, ६, १५, १६, १७, १८, १९ नम्बरको मतगणना भईसकेको छ ।