नेता बानियाँले भने–'एक दुई तीन यो बजेेट हावादारी हो'

२ असार, हेटौंडा । वागमती प्रदेश सरकारले सार्वजनिक गरेको आर्थिक वर्ष २०७७/७८ को राजश्व र व्ययको वार्षिक अनुमान बजेटमाथि प्रदेश सभामा मंगलबारबाट सैद्धान्तिक छलफल शुरु भएको छ ।

छलफलमा भाग लिँदै सत्तापक्ष र प्रतिपक्षी सांसदहरुले बजेटमाथि मिश्रित प्रतिक्रिया दिएका छन् । प्रमुख प्रतिपक्षी दल नेपाली कांग्रेसले त वागमती प्रदेश सरकारले ल्याएको बजेटलाई कपोलकल्पित र हावादारीको संज्ञा दिएको छ । प्रमुख प्रतिपक्षी दलका नेता इन्द्रबहादुर बानियाँले चालु आर्थिक बर्षमा बजेट खर्च नसकेको सरकारले ५१ अर्बको बजेट ल्याएको भन्दै यसलाई हावादारीको संज्ञा दिएका हुन् ।

उनले कोरोनाबाट थला परेको अर्थतन्त्र उकास्ने कुरा बजेटले सम्बोधन नगरेकोले राजस्व संकलन हुने अवस्था नरहेको भन्दै बजेटको चर्को आलोचना गरे । ‘तथ्य, यथार्थ र आर्थिक अनुशासनमा बजेट आएको छैन, यो बजेट प्रदेशका जनताको हितमा पनि छैन, त्यसैले यो बजेट एक दुई तीन हावादारी हो ।’ उनले बजेटले व्यवसायी, उद्योगी र पर्यटन, यातायात क्षेत्रलाई कुनै राहतको कुरा नगरेको तर कर उठाउने मात्रै कुरा गरेको भन्दै यसले सरकारको लक्ष्य अनुसार राजस्व संकलन नहुने निश्चित रहेको बताए । 

छलफलमा नेकपा सांसदहरु केशव स्थापित, राजेन्द्र पाण्डे लगायतले बजेटका राखिएका उद्देश्य सकारात्मक भए पनि कतिपय कुराहरुमा बजेटले ध्यान दिन नसकेको बताए । विवेकशील नेपाली दलका सांसद रमेश पौड्यालले प्रदेश सरकारले विगतमा गरेका प्रतिवद्धता अनुसार काम भए नभएको समिक्षा समेत नगरेको भन्दै बजेटको आलोचना गरे ।

यसअघि प्रदेशसभा बैठकमा आर्थिक मामिला तथा योजना मन्त्री कैलाशप्रसाद ढुङ्गेलले बजेटले सबै क्षेत्र समेट्न खोजेको भन्दै सकारात्मक सुझावको अपेक्षा गरेको बताए ।