हेटौंडाको मेयर र उपमेयरमा एमाले विजयी

१० जेठ, हेटौंडा । हेटौँडा उपमहानगरपालिकाको मेयरमा नेकपा एमालेका हरिबहादुर महत विजयी भएका छन् ।

मतगणना शुरू भएको दशौं दिन बुधबार दिउँसो प्राप्त परिणाम अनुसार महतले  २३ हजार  १  सय २४  मत प्राप्त गरि विजयी भएका छन् । उनका निकटतम प्रतिष्पर्धी नेपाली कांग्रेसका अानन्दराम पराजुलीले  २२ हजार ५ सय ९ मत प्राप्त गरेका छन् ।

उपमेयरमा एमालेकै मिना लामा विजयी भएकी छिन् । लामाले  २३ हजार  ४ सय ३० मत प्राप्त गरेकी छिन् भने प्रतिष्पर्धी माअोवादी केन्द्रका बलराम बलले १७ हजार  ११ मत प्राप्त गरेका छन् । ८३ हजार ५ सय ९७ मतदाता रहेको हेटौंडा उपमहानगरपालिकामा ६२ हजार २ सय ५ मत खसेको थियो ।

हेटौंडाको १९ वडामध्ये एमालेले १२, कांग्रेसले ५ र माअोवादीले २ वडामा विजय हासिल गरेको छ ।

को हुन् महत?
२०१६।१२।२० मा बुबा रमेशबहादुर महत र अामा पदमकुमारी महतको माईलो छोराको रूपमा जन्मिएका हुन्ने । नेकपा मालेबाट पार्टी राजनीति शुरू गरेका महत २०४३ सालमा पहिलो पटक जनप्रतिनिधि बनेका थिए । उनी पहिलो पटक हेटौंडा-५ को वडाध्यक्ष थिए । २०४३ सालमा हेटौंडा नगरपालिकाको उपमेयर बनेका उनी दोस्राे पटक २०४९ सालमा पुनः उपमेयर मेयर भएका थिए ।२०६६ सालमा खेलकुद विकास समितिको अध्यक्ष पनि भएका थिए ।

माले र एमाले एकीकरण भएपछि २०४७ सालमा एमाले जिल्ला सदस्य भएका थिए । हाल जिल्ला सचिवालय सदस्य रहेका महत ३ नम्बर क्षेत्रीय ईन्चार्ज समेत छन् । उनका २ छोरा, २ छोरी छन् ।

को हुन् लामा ?
२०३३।९।२७ मा बाबु शुक्रबीर लामा र अामा सितादेवी लामाको चौथो सन्तानको रूपमा जन्म लिएकी लामाले २०४६ सालमा अनेरास्ववियुबाट राजनीति यात्रा शुरू गरेकी थिईन् ।

अखिल नेपाल महिला संघको जिल्ला सचिव भईसकेकी लामा लोकतान्त्रिक अादीबासी जनजाति महासंघको केन्द्रीय सदस्य र जनजाति महासंघको जिल्ला अध्यक्ष पनि भईसकेकी छिन् । अहिले उनी एमाले जिल्ला उपसचिव रहेकी छिन् ।

हेटौंडा-१ निवासी सुनबहादुर लामासंग वैवाहिक जीवनमा बाँधिएकी उनका १ छोरा र १ छोरी छिन् ।