रातो किताब हात नपरेपछि सांसदहरु आक्रोशित

३ असार, हेटौंडा । बागमती प्रदेशसभामा विनियोजन विधेयक २०७७ टेबुल भएपनि सांसदहरुले नपाएको भन्दै आक्रोश व्यक्त गरेका छन् । प्रदेशसभाको बुधबारको बैठकमा आर्थिक मामिला तथा योजना मन्त्री कैलाश ढुंगेलले विधेयक संसदमा टेबुल गरेपनि सांसदहरुको हात नपरेको हो । 
सांसदहरुले विधेयक लिन संसद अगाडि कुर्नु परेको भन्दै गुनासो गरेका छन् । ‘संसदमा टेबुल भएको विधेयक कहिले हात पर्छ ठेगान नहुनु गैरजिम्मेवारीपन हो ।’–प्रमुख प्रतिपक्ष दल नेपाली कांग्रेस संसदीय दलका उपनेता कृष्णलाल भडेलले भने । ‘रातो किताब’ को रुपमा चिनिने विनियोजन विधेयकमा मन्त्रालयगत रुपमा बजेट बाँडफाँड हुने गरेकोले यसको महत्व बेग्लै हुने उनको भनाई छ । संसद बैठक अर्को सूचना नभएसम्मको लागि स्थगित भएको छ । ‘अब जिल्ला जाँदा कुन कुन योजना पर्यो भनेर जनताले सोध्दा के जवाफ दिने ?’–उनले भने । 
अधिकांश सांसद विनियोजन विधेयकको प्रति हात नपर्दा संसदमा कुरेर बसेका छन् । संसद स्रोतका अनुसार विनियोजन विधेयकको पुस्तक बुधबार साँझ मात्रै आउने छ । मुद्रणका क्रममा रहेकाले पुस्तक सांसदहरुलाई उपलव्ध गराउन ढिलाई भएको स्रोतको भनाई छ । सरकारी पक्षको गैरजिम्मेवार व्यवस्थापकीय कमजोरीका कारण यस्तो समस्या आएको भन्दै सांसदहरुको आक्रोश छ ।