हेटौँडा उपमहानगरपालिकाका जनप्रतिनिधिद्वारा सपथ तथा पदभार ग्रहण

१२ जेठ, हेटौँडा । बैशाख ३१ गते भएको स्थानीय तह निर्वाचनमा निर्वाचित हेटौँडा उपमहानगरपालिकाका प्रतिनिधिले शुक्रबार सपथ तथा पदभार ग्रहण गरेका छन् ।
जनप्रतिनिधिहरुले मूख्य निर्वाचन अधिकृतको कार्यालयमा पद तथा गोपनियताको सपथग्रहण गरेका हुन् । मूख्य निर्वाचन अधिकृत दयाराम ढकालले हेटौँडा उपमहानगरपालिकाका मेयर हरिबहादुर महत, उपमेयर मिनाकुमारी लामासहित १९ वडाका अध्यक्षहरुलाई सपथग्रहण गराएका छन् । अधिकृतले उपमहानगरपालिकामा निर्वाचित सदस्यहरुलाई प्रमाणपत्र समेत वितरण गरेका थिए । यसैगरी, हेटौँडा उपमहानगरपालिकामा निर्वाचित सदस्यहरुलाई नवनिर्वाचित मेयर हरिबहादुर महतले सपथग्रहण गराएका थिए ।

सपथग्रहण पछि मेयर महत, उपमेयर लामासहित विभिन्न वडाका अध्यक्षहरुले आफ्नो कार्यालयमा गएर पदभार ग्रहण समेत गरेका छन् । मकवानपुरको हेटौँडा उपमहानगरपालिका १९ वडामध्ये १२ वडामा एमाले, ५ वडामा कांग्रेस र २ वडामा माओवादी केन्द्रका अध्यक्षहरु विजयी भएका थिए । कार्यक्रममा सभासद्हरु अनन्त पौडेल, राजाराम स्यांतान, मकवानपुरका प्रमुख जिल्ला अधिकारी नारायणप्रसाद शर्मा दुवाडी लगायतले मन्तव्य व्यक्त गरेका थिए ।
समृद्ध हेटौँडा बनाउने महतको उद्घोष
हेटौँडा उपमहानगरपालिकाका नवनिर्वाचित मेयर हरिबहादुर महतले समृृद्ध हेटौँडा बनाउने उद्घोष गरेका छन् । उनले विगतमा गरेका कामका कारण देशकै नमूना नगरको रुपमा हेटौँडा परिचित रहेको भन्दै यसलाई थप व्यवस्थित गर्दै समृद्ध हेटौँडाको अवधारणा अघि सारिने बताए । सपथग्रहणपछि बोल्दै महतले बासुदेव सभागृहको पूर्णता, पर्यटकिय क्षेत्रको विकास, घण्टाघर निर्माण, मेडिकल कलेजको स्थापना, हेटौँडा अस्पतालको स्तारोन्नति, सुरुङ मार्ग निर्माणका लागि राज्यको ध्यानाकर्षण गराउने र विकासमा दुर्गम बस्तिलाई प्राथमिकता दिने जस्ता योजना रहेको बताए ।