मतदाता शिक्षा प्रभावकारी नहुँदा बढि मत बदर

१५ जेठ, हेटौँडा । स्थानीय तह निर्वाचनमा मतदाता शिक्षा प्रभावकारी नहुँदा मकवानपुरमा मत बढि बदर भएको पाईएको छ ।
मतदाता शिक्षा निर्वाचन आयोगले खटाएका प्रतिनिधिले प्रभावकारी ढंगबाट मतदाता शिक्षा नदिंदा बदर मत बढेको पाईएको हो । मतदाताको घरदैलोमा पुगेर शिक्षा दिनुपर्ने स्वयम्सेविकाहरुले पोष्टर टाँस्ने काम मात्रै गरेको मतदाताहरुको भनाई छ । यसले गर्दा धेरैले मतदान गर्ने तरिका र बदर हुने अवस्थाबारे जानकारी नभएको हेटौँडा–६ का गौरव पराजुलीले बताए । 
गाउँपालिका र नगरपालिकाका प्रमुख, उपप्रमुखको मत पत्र एउटा र वडाको मतपत्र अर्को बनाउन सकेपनि बदर मत घट्ने शिक्षक भरत सापकोटाको भनाई छ । ६२ हजार ८० मत खसेको हेटौँडा उपमहानगरपालिकामा मेयरमा ७ हजार ५ सय ८२ र उपमेयरमा ११ हजार ९ सय ९५ मत बदर भएको छ । वडा तहमा पनि ४० प्रतिशतसम्म मत बदर भएको पाईएको छ । 
मकवानपुरमा आवश्यक भन्दा बढि चिन्हमा मतदान, खालि मत, घेराभन्दा बाहिर मतदान गर्ने जस्ता कारणले बढि मत बदर भएको सहायक निर्वाचन अधिकृत अनन्त मरासैनीको अनुभव छ । विगतमा भन्दा ल्याप्चे मत भने काम भएको छ ।
पहिलो चरणमा भएको निर्वाचनको मत बदरबाट पाठ सिकेर निर्वाचन आयोगले आगामी निर्वाचनहरुमा प्रमुख, उपप्रमुखका लागि एउटा मत पत्र र वडा तहका लागि अर्को मतपत्र बनाए केही हदसम्म बदर मत घट्ने देखिन्छ । 
यसका साथै मतदाता शिक्षालाई पनि प्रभावकारी ढंगबाट संचालन गर्नुपर्ने देखिन्छ । निर्वाचन आयोगका साथै राजनैतिक दलले पनि मतदाता शिक्षामा सक्रियता देखाएर बदर मत घटाउन तर्फ ध्यान दिनु जरुरी छ ।