शेरबहादुर देउवा बने ४० अौं प्रधानमन्त्री

२३ जेठ, काठमाडौं । नेपाली कांग्रेसका सभापति एवं संसदीय दलका नेता शेरबहादुर देउवा नेपालको ४० अौं प्रधानमन्त्री बनेका छन् ।

मंगलबार बसेको व्यवस्थापिका संसदको बैठकबाट देउवा ४० अौं प्रधानमन्त्री बनेका हुन् । गणतन्त्र नेपालका उनी दशौं प्रधानमन्त्री समेत हुन् । उनी ३ सय ८८ मत ल्याई प्रधानमन्त्री बनेका छन् । प्रधानमन्त्री बन्न संसदमा रहेका ५ सय ९३ सांसदको बहुमत अर्थात २ सय ९७ मत अावश्यक थियो । संसदमा मतदानमा ५ सय ५८ सांसद सहभागी भएकोमा देउवाको पक्षमा ३ सय ८८ र विपक्षमा १ सय ७० मत मात्रै परेको छ ।

१२ बर्षमा खोला फर्कन्छ भन्ने नेपाली उखानलाई चरितार्थ गर्दै उनी १२ बर्ष ४ महिनामा चौथो प्रधानमन्त्री भएका छन् ।

यसअघि अाफुलाई प्रधानमन्त्री बनाईयोस् भन्ने देउवाको प्रस्तावमा माअोवादीका अध्यक्ष पुष्पकमल दाहाल, फोरम लोकतान्त्रिकका अध्यक्ष विजयकुमार गच्छदार, सांसदहरू जन्मदेव जोशी र प्रेमबहादुर सिंहले समर्थन गरेका थिए ।

प्रधानमन्त्रीको प्रस्ताव राख्दै गर्दा देउवाले तराई, मधेश, पहाड, हिमाल मिलेको नेपाल बनाउने अाफ्नो उद्धेश्य प्रकट गरेका छन् । प्रधानमन्त्री भएसंगै संसद बैठक कक्षमै सांसदहरूले बधाई दिएका छन् ।