नयाँ शक्तिले स्थापना दिवस मनायो

३० जेठ, हेटौंडा । नयाँ शक्ति पार्टी मकवानपुरले प्रथम पार्टी स्थापना दिवस मनाएको छ । पार्टीले मंगलबार हेटौंडा–४ हुप्रचौरमा रहेको पार्टी कार्यालय परिषरमा केक काटेर शुभकामना आदानप्रदान गर्दै स्थापना दिवस मनाएको हो ।

पार्टीका जिल्ला तहका नेता तथा कार्यकर्ता सहभागी कार्यक्रममा पार्टीका केन्द्रीय सदस्य तथा ३ नम्बर प्रदेश सहसंयोजक सोनामसिं स्याङ्तान ‘विजय’ले केक काटेर सबैलाई खुवाएका थिए । कार्यक्रममा बोल्दै केन्द्रीय सदस्य स्याङ्तानले नयाँ शक्तिले स्थापनाको एक वर्षको अवधिमा आफ्नो विचार र सिद्धान्त जनतामाझ पुर्‍याउन सफल भएको बताए ।

लोकतान्त्रिक गणतन्त्रलाई संस्थागत गर्दै आर्थिक समृद्धि र स्वाधिनतासहितको मुद्दा लिएर वैकल्पिक पार्टीको रुपमा नयाँ शक्ति उदाएको भन्दै स्याङ्तानले अबको केही वर्षभित्र देशकै ठूलो पार्टी बन्नेमा विश्वास व्यक्त गरे । ‘अरु पार्टीहरु भन्दा पृथक कार्ययोजना बनाएर हामी आएका हौं, एक वर्षको बीचमा हामीले हाम्रा नीति र सिद्धान्तहरु जनतामाझ पुर्‍याउन सकेका छौं,’ उनले भने–‘सांगठनिक दरिलो बन्नको लागि हामीले अझ धेरै मेहनत गर्न बाँकी नै छ ।’

कार्यक्रममा पार्टीका जिल्ला कार्यालय सचिव राजेन्द्र सिम्खडा, जिल्ला कार्यकारी समिति सदस्य प्रकाश मैनाली, इजहार आलम, प्रकाश थोकर, तुफान विक्रम क्षेत्री ‘दीपशक्ति’लगायतको उपस्थिति रहेको थियो ।