विश्वमा कोरोना संक्रमणबाट ७ लाख ९० हजारको ज्यान गयो

४ भदौ, हेटौंडा । विश्वव्यापी महामारी बनेको कोरोना भाइरसको संक्रमणबाट अहिलेसम्म विश्वमा ७ लाख ९० हजार मानिसको ज्यान गएको छ ।
वितेको २४ घण्टामा ६ हजार ४ सय ८१ जनाको ज्यान गएपछि विश्वभर कोरोना संक्रमणबाट ज्यान जानेको संख्या ७ लाख ९० हजार पुगेको कोरोना संक्रमितको तत्थ्यांक प्रस्तुत गरिरहेको वेबसाईट वल्डोमिटरले जनाएको छ ।
यसैगरी कोरोना संक्रमणलाई जितेर १ करोड ५२ लाख ९० हजार भन्दाबढी मानिस घर फर्किएका छन् ।
विश्वका २१६ देशमा फैलिएको कोरोनाका कारण सबैभन्दा बढी मानिसको मृत्यु अमेरीकामा भएको छ । अमेरीकामा कोरोना संक्रमणबाट मृत्यु हुनेको संख्या १ लाख ७६ हजार३ सय २८ पुगेको छ । यहाँ  पछिल्लो २४ घण्टामा १ हजार २ सय ५४ जनाको ज्यान गएको छ । 
यसैगरी विश्वको दोश्रो सबैभन्दा बढी ज्यान गएको ब्राजिलमा पछिल्लो २४ घण्टामा १ हजार १ सय ७० जनाको ज्यान जाँदा कुल मृतकको संख्या १ लाख ११ हजार १ सय ८९ पुगेको छ । 
यस्तै तेश्रो सबैभन्दा बढी मृतक रहेको मेक्सिकोमा अहिलेसम्म ५७ हजार ७ सय ७४ जनाको ज्यान गएको छ । यहाँ पछिल्लो २४ घण्टामा ७ सय ५१ जनाले ज्यान गुमाएका छन् ।
यसैगरी संक्रमित हुनेको विश्वको तेश्रो स्थानमा रहेको भारत कोरोनाको संक्रमणबाट मृत्यु हुनेको देशमा विश्वमा चौथो स्थानमा रहेको छ । 
यहाँ अहिलेसम्म ५३ हजार ९ सय ९४ जनाको कोरोना संक्रमणबाट ज्यान गएको छ । भारतमा वितेको २४ घण्टामा ९ सय ८० जनाको ज्यान गएको छ ।