चुनाव हार्दैमा निराश हुन पर्दैन : न्यौपाने

५ असार, हेटौंडा । नेपाली काँग्रेस मकवानपुरका निवर्तमान सभापति रघुरमण न्यौपानेले स्थानीय तहको निर्वाचनमा मकवानपुरको केही स्थानमा चुनाव हार्दैमा निराश हुनुपर्ने अवस्था नरहेको बताएका छन् । 

कम्युनिष्टहरुको किल्लाको रुपमा रहेको मकवानपुरको २ वटा गाउँपालिका, थाहा नगरको उपमेयरसहित हेटौंडा नगरको समेत ५ वटा वडा जितेको उदाहारण दिंदै उनले हारेको स्थानमा समेत निकटतम प्रतिष्पर्धी भएको बताए । नेपाली काँग्रेस हेटौंडा–१४ नम्बर वडाको आयोजनामा भएको धन्यवाद ज्ञापन कार्यक्रममा न्यौपानेले भने, ‘केही स्थानमा झिनो मतले पराजय भएका छौं । हेटौंडा उपमहानगरमा तालमेलको बिषयलाई बुझाउन नसक्दा धेरै मत बदर भयो, त्यसकारण थोरै मतले पराजय भयौँ । यसलाई शिक्षाको रुपमा लिएर अघि बढ्नु आवश्यक ।’  प्रदेश र केन्द्रीय संघको निर्वाचन बाँकी नै रहेको बताउँदै न्यौपानेले अब त्यसतर्फ केन्द्रीत हुन कार्यकर्ताहरुलाई अनुरोध गरे । 

यस्तै स्थानीय तहको निर्वाचनमा नेपाली काँग्रेसको तर्फबाट हेटौंडा उपमहानगरपालिकाको मेयरको प्रत्यासी रहेका काँग्रेस नगर सभापति आनन्दराम पराजुलीले निर्वाचनको समयमा गरेका वाचाहरु पूरा गर्न आफू सदैव तत्पर रहेको बताए । ‘मलाई नगरबासीले धेरै माया गर्नुभएको छ । मत पनि दिनुभएकै हो’, पराजुलीले थपे, ‘हामीले मतदातालाई बुझाउन नसक्दा थोरै मतले हार व्यहोर्न पुग्यौँ । हामी निराश हुनुपर्ने अवस्था छैन ।’ 
उनले चुनाव हारेका कारण निराश र हतोत्साही नहुन कार्यकर्तालाई अनुरोध गर्दै निरन्तर संगठन निर्माण र कार्यकर्ताहरुसंग सम्पर्कमा रहन अनुरोध गरे ।

काँग्रेसको तर्फबाट १४ नम्बर वडा अध्यक्षका प्रत्यासी गणेशबहादुर स्याङ्तानको अध्यक्षतामा भएको कार्यक्रममा सहकारीकर्मी मीठुमाया गोले, तरुण दल वडा सचिव नवराज थिङलगायतले मन्तव्य व्यक्त गरेका थिए ।