बुधवार हुने निर्वाचनको तयारी पूरा 

१३ असार, हेटौँडा । निर्वाचन आयोगले दोस्रो चरणमा  निर्वाचन अन्तरगत असार १४ गते बुधवार प्रदेश नं १, ५ र ७ का ३५  जिल्लाका एक महानगरपालिका, सात उपमहानगरपालिका, एक सय ११ नगरपालिका र २१५ गाउँपालिका गरी कुल ३३४  वटा स्थानीय  तहमा हुने निर्वाचनको सम्पूर्ण तयारी पूरा भएको जनाएको छ ।

निर्वाचन आयोगले मंगलवार  मिडिया सेन्टरमा आयोजित पत्रकार सम्मेलन मार्फत प्रमुख निर्वाचन आयुक्त डा अयोधीप्रसाद यादवले यसो बताएका हुन्  । आयुक्त यादवले मतदाताले एक दिन राष्ट्रका लागि समय प्रदान गरी दुःख सहेर भए पनि मतदानमा सरिक मतदान गर्न अनुरोध समेत गरे  ।

दोस्रो चरणका निर्वाचनका लागी आठ हजार ३६४ मतदान केन्द्रको स्थापन गरिएको छ ।  निर्वाचनबाट ६४ लाख ३२ हजार ७६५ मतदाताले मतदानमा सहभागी भई १५ हजार ३८ प्रतिनिधिलाई निर्र्वािचत गराउन मतदान  गर्नेछन जसका लागि ६२ हजार ४०८ उम्मेदवार चुनावी प्रतिस्पर्धामा छन् । भने ४१ उम्मेदवार निर्विरोध निर्वाचित भइसकेका छन् । 

यता, आयोगले मतदाता नामावली तथा मतदाता परिचयपत्रमा सामान्य त्रुटि पाइएमा स्थानीय तह निर्वाचन निर्देेशिका बमोजिम सानोतिनो भूलचुक मानी निजको नागरिकता प्रमाणपत्रको विवरणलाई मूल आधार लिई मतदान गर्न दिने व्यवस्था मिलाएको बताएको छ । निर्वाचनमा ४८ संस्थाका छ हजार ७३३ पर्यवेक्षकले निर्वाचन पर्यवेक्षण गर्ने छन् भने आयोगले ३५ वटै जिल्लामा अनुगमनकर्ता र सूक्ष्म अनुगमनकर्ता खटाएको छ ।

अपाङ्गता भएका, गर्भवती, सुत्केरी, ज्येष्ठ नागरिक, अशक्त वा बिरामी मतदातालाई मतदान गर्ने कार्यमा प्राथमिकता दिई उचित व्यवस्थापन मिलाउन र सहज ढङ्गले मतदानको प्रबन्ध गर्न निर्देशन दिइसकिएको आयोगले पत्रकार सम्मेलन मार्फत जनाएको छ । मतदाताले बिहान ७ बजेदेखि अपराह्न ५ बजेसम्म मतदानस्थलमा प्रवेश गरी मतदान गर्नसक्ने छन् ।