कोइरालाको जन्मजयन्ती मनाईयो

१८ असार, हेटौंडा । नेपाली काँग्रेस मकवानपुरले लोकतान्त्रिक आन्दोलनका अगुवा स्वर्गीय गिरिजाप्रसाद कोइरालाको जन्मजयन्ती आईतबार मनाएको छ ।
स्वर्गीय गिरिजाप्रसाद कोइरालाको ९४ औं जन्मजयन्तीका अवसरमा नेपाली काँग्रेस मकवानपुरका कार्यबाहक सभापति विष्णुप्रसाद लामिछानेलगायतका जिल्लाका नेता तथा कार्यकर्ताहरुले कोईरालाको फोटोमा माल्यार्पण गर्दै जन्मजयन्ती मनाईएको हो ।
जन्मजयन्ती कार्यक्रममा बोल्दै कार्यबाहक सभापति लामिछानेले २०६२/६३ सालको जनआन्दोलनका नायक गिरिजाप्रसाद कोइरालाले देश र जनताको लागि गरेको महत्वपूर्ण योगदान विर्सन नहुने बताए ।कोइरालाको २०६६ चैत ७ गते निधन भएको थियो ।पार्टी कार्यालयमा भएको कार्यक्रममा पार्टीका पदाधिकारीहरु, जिल्ला सदस्य एवं विभिन्न नेता तथा कार्यकर्ताको उपस्थिति रहेको थियो । 

कोईरालाको नेतृत्वमा २ सय ३८ वर्षे सामन्ती राजतन्त्रको अन्त्य गराउनुको साथै १० वर्षे सशस्त्र द्वन्दमा होमिएका माओवादीलाई संसदीय अभ्यासमा ल्याउने कामसमेत उनले गरेका थिए ।
गिरिजाप्रसाद कोइरालाका बुवा कृष्णप्रसाद कोइरालालाई तत्काकालिन राणा शासकहरुले निर्वासनमा पठाएका बेला बि.सं. १९८१ असार १८ गते भारतको बिहारस्थित सहर्सा जिल्लामा उनको जन्म भएको हो ।
नेपाली काँग्रेसको नेतृत्व र प्रधानमन्त्रीका रुपमा सबैभन्दा धेरै पटक देशको नेतृत्व गर्नुका साथै मुलुककै पहिलो राष्ट्रप्रमूखसमेत रहेका कोइरालाले पछिल्लो समय देशमा गणतन्त्र स्थापनाका लागि खेलेको भूमिका सबैका लािग स्मरणीय छ ।