हत्या घटनाको छानविन गर्न माग

२० साउन, हेटौँडा । अन्तरजातिय विवाह गरेको कारण एक युवकको हत्या भएको भन्दै किशोरकिशोरी समूह सञ्जाल मकवानपुरले छानविनको माग गरेको छ । मकवानपुरका प्रमुख जिल्ला अधिकारी मानबहादुर विकमार्फत विहिबार ज्ञापनपत्र बुझाउँदै उनीहरुले प्रधानमन्त्रीको ध्यानाकर्षण गराएका हुन् । 
सञ्जालले काभ्रे पाँचखाल नगरपालिका–६ का अजित मिजारको अन्तरजातिय बिबाहका कारण हत्या भएको भन्दै हत्यारालाई कार्बाहिको माग गरेका छन् ।  असार २५ गते स्थानीय कल्पना पराजुलीसँग मिजारले विवाह गरेपछि विवाद हुँदा पाँचखाल प्रहरी चौकीले मिलापत्र गरी दुबैलाई आफ्नो अभिभावको जिम्मा लगाएको थियो । असार २९ गते वेपत्ता भएका मिजार असार ३० गते धादिङ कम्पुर–३ मा झुण्डिको अवस्थामा फेला परेका थिए । घटनास्थल पुगेका आफुन्तले घटना शंकास्पद भएको भन्दै प्रहरीमा उजुरी दर्ता गरेपनि छानविनमा वेवास्ता भएको ज्ञापनपत्रमा उल्लेख छ । 
प्रशासन कार्यालय पुगेर सञ्जालमा आवद्ध एकता किशोर किशोरी सञ्जाल मनहरी, मेलमिलाप किशोर किशोरी सञ्जाल पदमपोखरी, शसक्त किशोर किशोरी सञ्जाल, थाहानगर, चेतनशिल किशोर किशोरी सञ्जाल हाँडिखोला, अधिकार मुखी किशोर किशोरी सञ्जाल निबुवाटार–भिमफेदि, सम्बाद किशोर किशोरी सञ्जाल एनिमेटर छत्तिवन, पारीजात किशोर किशोरी सञ्जाल बसामाडि, समाज किशोर किशोरी सञ्जाल हर्नामाडि, नबयुग किशोर किशोरी सञ्जाल हटिया, प्रशंसा किशोर किशोरी सञ्जाल मकवानपुर गढिमा आवद्ध किशोरकिशोरीले प्रमुख जिल्ला अधिकारी विकलाई संयुक्त ज्ञापन पत्र बुझाएका छन् ।