मकवानपुरमा तिहार अवधिमा ६ सवारी दुर्घटना,३९७ कारवाहीमा

४ मंसिर,हेटौँडा। मकवानपुरमा यस वर्ष तिहारको समयमा कम सवारी दुर्घटना भएका छन भने २ वटा सवारी दुर्घटनामा परी ६ जना घाइते भएका छन्। कार्तिक २८ गते काग तिहारदेखि मंसिर ३ गतेसम्म ३९७ वटा सवारीलाई ट्राफिक कारवाही गरिएको जिल्ला ट्राफिक प्रहरी कार्यालय मकवानपुरका प्रहरी निरीक्षक प्रकाश पाण्डेले बताएका छन् ।

ट्रफिक नियम विपरीत गलत ढंगले चलाइएका, सवारी कागजात नभएका, यात्रुसँग बढी भाडा लिइएका साना ठुला गरेर ३९७ सवारीलाई कारवाही गरिएको प्रहरी निरीक्षक पाण्डेले बताएका छन् । मकवानपुर प्रहरीले यस बर्षको दशैँको अवधिमा ९५५ वटा सवारीलाई ट्राफिक कारवाही गरेको थियो। 

त्यसैगरी तिहार  अवधिभर २  सवारी दुर्घटनामा परेको जसमा ६ जना घाइते भएको उनले प्रष्ट खबरलाई बताएका छन् ।यता ट्राफिक प्रहरीले तिहार अवधिमा गरेको कारवाहीमार्फत ३  लाख ६६ हजार राजश्वसमेत सङ्कलन गरिएको जनाइएको छ । 

जिल्ला ट्राफिक प्रहरी कार्यालय मकवानपुरले कार्तिक महिनामा ३१०० सय सवारीलाई ट्राफिक कारवाही गरेको र २७ लाख ५९ हजार ५०० सय राजश्व संकलन गरेको जनाइएको छ।कोरोनाको जोखिम र सवारीसाधन कम चल्दा दुर्घटनामा कमी आएको हो भने सवारी कारवाहीको संख्यामा वृद्धि भने भएको छ।