महोत्तरीमा प्रहरीको गोली लागी घाइते २ जनालाई काठमाडौं लगियो,डिएसपी सहित १५ घाइते

९ मंसिर, महोत्तरी। बर्दिबास नगरपालिका–१४ स्थित शुभम् वस्तीकी बालिका ६ वर्षीया गुलाव शाह खातुनको हत्यामा संलग्नलाई पक्राउ र पीडित पक्षलाई क्षतिपूर्तिको माग राखेर  स्थानीयले गरेको प्रदर्शनले उग्ररुप लिएपछि  प्रहरीले चलाएको गोली लागेर घाइते भएका दुई जनालाई थप उपचारका लागि काठमाडौं लगिएको छ।

घटनाको विरोधमा स्थानीयबासीले पूर्वपश्चिम राजमार्ग र वीपी राजमार्ग बन्द गरेपछि  सडक खुलाउन गरेको डिएसपी सहितको टोलीमाथि  स्थानीयबासीले ढुंगा प्रहार गर्न थालेपछि प्रहरीले गोली चलाएको थियो। गोली लागेर बर्दिबास नगरपालिका–१ का ४५ वर्षका सञ्जय न्यौपाने र बर्दिबासकै श्याम कार्की घाइते भएको जनाइएको छ।घाइते न्यौपानेको कम्मरमुनिको भागमा गोली लागेको छ। कार्कीको घाँटीमा गोली लागेको छ। न्यौपाने र कार्कीको बर्दिबासमा उपचार संभव नभएपछि थप उपचारका लागि   हेलिकप्टरमार्फत् काठमाडौं लगिएको हो। 

             डिएसपीसहित १५ प्रहरी घाइते

स्थानीयबासीको भीड नियन्त्रणका क्रममा जिल्ला प्रहरी कार्यालय महोत्तरीका प्रवक्ता डिएसपी प्रकाश बिष्टसहित १५ जना प्रहरी घाइते भएका छन्। डिएसपी बिष्टको मुखमा ढुंगाले लागेको जिल्ला प्रहरी कार्यालय महोत्तरीले जानकारी दिएको हो। अन्य प्रहरीको पनि शरीरका विभिन्न भागमा चोट लागेको महोत्तरी प्रहरीले जनाएको छ। महोत्तरीमा आइतबार साँझदेखि हराइरहेकी बालिकाको शव फेला परेको थियो।

 बर्दिवास नगरपालिका–१४ का शहीद आलमकी ६ वर्षीया छोरी गुलाव साह खातुनको शव प्रहरीले सोमबार मध्यराति फेला परेको थियो। बालिकाको शव बर्दिवास–१४ कै शुभम बस्ती नजिकको झाडीमा बोरामा खाँदेको अवस्थामा फेला परेको ईलाका प्रहरी कार्यालय बर्दिबासका  डिएसपी  राजन चापागाईंले बताएका छन्। हत्या गरेको आशङ्कामा प्रहरीले जिल्लाकै गौशाला नगरपालिका–५ का २५ वर्षीय अरुणकुमार साहलाई पक्राउ गरेको छ।