फेकोफन बागमती प्रदेशले बुझायो वनमन्त्रीलाई ज्ञापनपत्र

भीमसेन पौडेल

१२ मंसिर,हेटौडा । रुख कटान, विक्री वितरण र ओसारपसारमा लगाईएको प्रतिवन्ध फुकुवा गर्नु पर्ने लगायतको माग राखी शुक्रवार बागमती प्रदेशका उद्योग, पर्यटन वन तथा वातावरण मन्त्री अरुण नेपाललाई सामुदायिक वन उपभोक्ता महासंघ, बागमती प्रदेशले ज्ञापनपत्र बुझाएको छ ।

महासंघ बागमती फेकोफन बागमती प्रदेशका अध्यक्ष विनोद सापकोटाको नेतृत्वमा गएको टोलीले  मन्त्री नेपाललाई ज्ञापनपत्र बुझाएका हुन ।ज्ञापन पत्रमा उच्चस्तरीय छानविन समितिले बुझाएको प्रतिवेदनलाई कार्यान्वयन गर्नु पर्ने उल्लेख गरिएको छ ।रोकिएको काठ कटान ओसारपसार र विक्री वितरण तत्काल खुला गर्नु पर्ने,सामुदायिक वन उपभोक्ता समूहको विधान तथा कार्ययोजनामा उल्लेख भए बमोजिमको साधारणसभाले गरेको निर्णय अनुसार वन सम्वर्धनका कार्यहरु गर्ने, वैज्ञानिक वन व्यवस्थापन कार्यविधि २०७१ खारेज गर्ने उल्लेख गरिएको छ । 

त्यसैगरी प्रदेश उद्योग, पर्यटन, वन तथा वातावरण मन्त्रालयबाट चालु वैज्ञानिक वन व्यवस्थापन कार्यक्रमलाई रोक्नु पर्ने, सामुदायिक वन उपभोक्ता समूहको सुशासन र क्षमता अभिवृद्धिका लागि वन सम्वन्धि कार्यक्रम संचालन गर्नुपर्ने, चुरे संरक्षण व्यवस्थापन स्थानीय समूदायका नेतृत्वमा हुने गरी वन ऐनमा व्यवस्थापन गर्ने लगायतका १२ वटा मागहरु समावेश गरिएका छन । 

कार्यक्रममा सामुदायिक वन उपभोक्ता महासंघ, मकवानपुरका अध्यक्ष साधुराम चौलगाई,महासंघ बागमती प्रदेशकी कोषाध्यक्ष निर्मला न्यौपाने, सदस्य रामहरि चौलागाई,अर्जुनप्रसाद दाहाल, महासंघ हेटौडाका अध्यक्ष शम्भुप्रसाद न्यौपाने, विभिन्न सामुदायिक वनका प्रतिनिधी,संचारकर्मी लगायतका उपस्थिति रहेको थियो ।