फेकोफन मकवानपुरद्वारा वन उद्यम सम्वन्धी छलफल

१६ मंसिर, हेटौंडा । सामुदायिक वन उपभोक्ता महासंघ मकवानपुरको आयोजना र हरियो वन कार्यक्रमको सहयोगमा हेटौंडामा ‘वन उद्यम विकासमा सामुदायिक वनको भूमिका’ विषयक अन्तरक्रिया कार्यक्रम भएको छ ।
कार्यक्रमका प्रमुख अतिथि बागमती प्रदेश उद्योग, पर्यटन, वन तथा वातावरण मन्त्रालय सचिव सिन्धु ढुंगानाले सामुदायिक वनले वन संरक्षणको क्षेत्रमा उल्लेख्य कार्य गरेको बताउँदै आफु सदैव सामुदायिक वन उपभोक्ता महासंघसंग मिलेर काम गर्न तयार रहेको बताए । वनले उद्यम संचालन गर्दै समुहभित्र रहेका विपन्न उपभोक्ताहरुको जीवनस्तर उठाउनुपर्नेमा जोड दिए । उनले पछिल्लो समयमा काठ सदुपयोगमा लगाएको प्रतिवन्ध तत्काल फुकुवा हुनुपर्ने बताए ।
कार्यक्रममा सामुदायिक वन उपभोक्ता महासंघकी केन्द्रीय अध्यक्ष भारती पाठकले उच्चस्तरीय छानविन समितिले बुझाएको प्रतिवेदन अनुसार सालको काठ ओसारपसार तत्काल खुला गर्नुपर्ने बताईन् । सरकारले संचालन गरेको बैज्ञानिक वन व्यवस्थापन खारेज गरी त्यसमा छुट्टयाईएको बजेट सामुदायिक वन समूहका कार्यक्रममा खर्च गर्नुपर्नेमा जोड दिईन् ।
महासंघ मकवानपुरका अध्यक्ष साधुराम चौलागाईको सभाध्यक्षतामा भएको कार्यक्रममा महासंघ बागमती प्रदेशका सदस्य रामहरी चौलागाई, जिल्ला उपाध्यक्ष गोपिमाया अधिकारी, कोषाध्यक्ष बलराम अधिकारी, महासंघ हेटौंडा नगर अध्यक्ष शम्भुप्रसाद न्यौपाने, बागमती अध्यक्ष दलबहादुर राई, थाहा नगर अध्यक्ष शिवराम थापा क्षेत्री लगायतले मन्तव्य व्यक्त गरेका थिए । कार्यक्रममा स्थानीय महासंघका अध्यक्षहरुसहितको बैठक समेत बसेको थियो ।
यसैगरी, कार्यक्रममा उद्योग, पर्यटन, वन तथा वातावरण मन्त्रालयका सचिव सिन्धु ढुंगानालाई स्वागत गरिएको थियो ।