हेटौँडा जेसिजको आयोजनामा शनिबार मकवानपुरमा महिला साइक्लिङ्ग रेस हुने

१८ मंसिर,हेटौँडा । हेटौंडा जेसीजको आयोजनामा शनिबार मकवानपुरमा  राष्ट्रिय स्तरको महिला साइक्लिङ्ग रेस हुने भएको छ।बिहिबार दिउँसो हेटौंडामा पत्रकार भेटघाटको आयोजना गदैं यस बारेमा जानकारी गराएको हो।

पत्रकार भेटघाट मार्फत  मंसिर २० गते शनिबार बिहान ९ बजे साइक्लिङ्ग रेसको आयोजना गरिने बताइएको हो।  मकवानपुरगढी गाउँपालिका वडा नं ४ स्थित सामरी पुलदेखि भीमफेदी गाउँपालिका वडा नम्वर १ हुँदै मकवानपुरगढी – ५ मा पर्ने गुम्बाडाँडासम्म साइक्लिङ रेसको आयोजना गरिने जेसिज सन २०२० का अध्यक्ष राजदेव बानियाँले बताएका छन्। 

प्रतियोगितामा प्रथम, द्वितीय र तृतीय हुने सहभागीले मेडल, प्रमाणपत्रसहित क्रमशः नगद १८ हजार, १२ हजार र ६ हजार रुपैँया प्राप्त गर्ने जनाइएको छ।लक्ष्मी महर्जन र मकवानपुरे प्रतियोगी कविता दास समेत १२ जना राष्ट्रिय खेलाडिको सहभागी रहने प्रतियोगितामा मकवानपुर साइक्लिङ् एशोसिएसनले प्राविधक सहयोग  रहने आयोजकले जनाएको छ। कार्यक्रममा भीमफेदी गाउँपालिकाका अध्यक्ष हिदम लामाको प्रमुख आतिथ्यता रहने पत्रकार भेटघाटमा बताइएको छ। महिला सशक्तिकरण सन्देश प्रवाह गराउने उद्देश्यले प्रतियोगिता आयोजना गर्न लागिएको जेसिज अध्यक्ष बानियाँले बताए।