सिमा नाकालाई कडाई गर्दै कपिलवस्तु प्रहरी ,पाँच महिनामा ६ गुण बढी राजश्व संकलन

२७ मंसिर,तौलिहवा । जिल्ला प्रहरी कार्यालय कपिलवस्तुले पछिल्लो पाँच  महिनामै अघिल्लो वर्ष उठेको राजश्वको ६ गुणा बढी राजश्व संकलन गर्न सफल भएको छ।

अघिल्लो वर्ष अर्थात आर्थिक वर्ष २०७६।०७७ मा कपिलवस्तु प्रहरीले  ५५ लाख राजश्व उठाएकोमा यस बर्ष आर्थिक वर्षको ५ महिना र अघिल्लो आर्थिक वर्षको असारसमेत गरी ३ करोड ११ लाख राजश्व उठाएको छ  । यो आर्थिक वर्षका ५ महिनामा मात्रै २ करोड ६४ लाख ९२ हजार ८ सय ३० रुपैयाँ राजश्व उठाउन प्रहरी सफल भएको जिल्ला प्रहरी कार्यालयका प्रमुख प्रहरी उपरीक्षक (एसपी) नवराज अधिकारीले बताएका छन् । उनले अघिल्लो वर्षभन्दा ५ दशमलव ६५ गुणा बढी राजश्व उठाउन आफूहरु सफल भएको बताए । 

"सिमावर्ती जिल्लाको रुपामा रहेको सिमा नाकाबाट सामान भित्र्याउने र बाहिर पठाउने गर्दा प्राय धेरै राजश्व उठ्ने गर्छ । कार्यालयको रेकर्ड अनुसार अहिलेसम्म सवारी साधन, लत्ता कपडा, किराना सामान, रागा,भैसी, खसी बोका, केराउ, सुन, चाँदी र अन्य सामानको भन्सारवापत त्यती राजश्व उठेको हो"–एसपी अधिकारीले भने । 

त्यस्तै कपिलवस्तु प्रहरीले ५ महिनामा विभिन्न आरोपमा फरार रहेका ८८ जनालाई पक्राउ गरी १४ लाख ५१ हजार १४४ जरिवाना गराएको छ भने २८ वर्ष २ महिना २९ दिन कैदका लागि सम्बन्धित निकायमा पठाएको जनाइएको छ ।

एसपी अधिकारी जिल्ला आएसँगै जिल्लाको शान्ति सुरक्षा मजबुत रहेको विभिन्न कार्यक्रम मार्फत  सरोकारवाला निकायले  बताएका छन्। प्रहरी उपरीक्षक अधिकारी बढुवासँगै पदस्थापन भएर  गत असार ५ गते कपिलवस्तुको प्रहरी कमाण्ड समाल्न  पुगेका थिए ।