एन्फा कोकाकोला अन्तर विद्यालय फुटबल प्रतियोगिताः वालज्योती पीप्लेको विजय सुरुवात

३ साउन, हेटौँडा । हेटौंडामा मंगलबारबाट सुरु भएको एन्फा कोकाकोला अन्तर विद्यालय छात्र फुटबल प्रतियोगितामा हेटौंडा–५ को बालज्योति माविले विजय सुरुवात गरेको छ । मङ्गलबार भएको उद्घाटन खेलमा साविक विजेता भीमफेदीको महेन्द्र माविलाई टाइब्रेकरमा ३–० गोल अन्तरले हराउँदै बालज्योतिले विजय यात्रा सुरु गरेको हो ।
निर्धारित समय गोलरहित बराबरीमा टुङ्गिएपछि टाइब्रेकरबाट विजेताको टुङ्गो लगाइएको हो । बालज्योतिका तर्फबाट बुद्ध तितुङ, मिलन अर्याल र सुमन राईले गोल गरे । खेलको म्यान अफ दी म्याच बालज्योतिका गोलगोरक्षक अनन्त पाठक भए ।
हेटौंडा–९ स्थित औद्योगिक क्षेत्रको मैदानमा सुरु भएको प्रतियोगिताको उद्घाटन नेपाल उद्योग वाणिज्य महासंघका कार्यसमिति सदस्य अरुणराज सुमार्गीले गरेका हुन् । फुटबल संघका कार्यवाहक अध्यक्ष अतुल बर्माको अध्यक्षतामा भएको उद्घाटन कार्यक्रममा मकवानपुर जिल्ला खेलकुद विकास समितिका अध्यक्ष माधव तिमल्सिना, फुटबल संघका अध्यक्ष राजेन्द्र श्रेष्ठ, हेटौंडा औद्योगिक व्यवस्थापन क्षेत्रका इन्जिनियर निमेष अधिकारी, खेलकुद विकास समिति प्रमुख राजन दाहाल खुसराज, ईलाका प्रहरी कार्यालय पशुपतिनगरका प्रहरी नायब निरीक्षक बिष्णुबहादुर अधिकारी, एन्फा प्रशिक्षक विजयलाल श्रेष्ठ, फिफा रेफ्री युनाल मल्ललगायतको आतिथ्यता रहेको थियो ।
प्रतियोगितामा जिल्लाका १६ बिद्यालयको सहभागिता रहेको संयोजक युवराज लामाले जानकारी दिए ।