आजदेखि मौसममा सुधार हुने 

google

२२ पुस, हेटौंडा । काठमाडौं उपत्यकासहित देशभर आजबाट मौसम सफा हुने अनुमान गरिएको छ । वायू प्रद्रूषणको खतराको सतह नाघेपछि काठमाडौं उपत्यकासहित मुलुकका विभिन्न सहर प्रदूषित बनेको थियो । 
सोमवार विहानबाट धुम्बिएको आकाश आजबाट विस्तारै सफा हुँदै जाने बताइएको छ । एकाएक प्रदूषणको मात्रा बढ्नुमा बादलले माथिबाट ढपक्क ढाक्दा प्रदूषणको अन्यत्र आउजाउ गर्न नपाउनु मुख्य कारण रहेको विज्ञहरुले बताएका छन् । 
आकाश खुल्न साथ वा पानी परेपछि प्रदूषणको मात्रा कम हुने उनीहरुको धारणा छ । काठमाडौं उपत्यकाका तीन ओटा जिल्लामा हिजै बिहानैदेखि वायू प्रदुषणको स्तर गम्भीर अवस्थामा पुगेको छ । हिजो बिहान काठमाडौंको रत्नपार्कको वायु प्रदुषणको मापन ४ सय ८८ कायम गरिएको छ । वायु गुणस्तरको सूचकाङ्ग (एक्यूआई) अनुसार ३ सयदेखि ४ सयसम्मको एक्यूआई सूचकाङ्गलाई निकै नै खराब तथा ४ सय १ देखिमाथिलाई गम्भीर मानिन्छ । 
जल तथा मौसम पूर्वानूमान महाशाखाले काठमाडौं उपत्यकामा आजदेखि मौसममा सुधार आउने र देशभरि भोलिदेखि मात्रै मौसम सफा हुने जनाएको छ । महाशाखाका मौसमविद् वरुण पौडेलले पश्चिमी वायूूको प्रभावसँगै काठमाडौंको आकाशमा बादल लागेकोले उपत्यकाको प्रदुषित वायू बाहिर निस्किन नपाउँदा झन् झन् थपिँदै गएर कुहिरो बनेको बताए ।
यसैबीच सरकारले कोरोनाभाइरसको सङ्क्रमणको जोखिम कायमै रहेका बेला जाडोमा जनस्वास्थ्यमा पुग्ने असर थप जटिल हुने भएकाले सावधानी अपनाउनु आग्रह गरेको छ ।