हेटौँडामा किर्ते गरी रकम झिक्ने सचिव पक्राउ

११ साउन, हेटौँडा । कृषि विकास बैंकको चेक किर्ते गरी रकम झिक्ने एक सचिव बुधबार हेटौँडाका पक्राउ परेका छन् ।
चुरियामाई संयुक्त खानेपानी तथा उपभोक्ता सरसफाई समिति नयाँ बस्तीका सचिव दलबहादुर विसीलाई चेक किर्ते गरि रकम झिकेको भन्दै प्रहरीले पक्राउ गरेको हो । विसीले संस्थाले कृषि विकास बैंक बैंकिङ कार्यालयबाट ५० हजार रुपैँया रकम झिक्ने निर्णय गरेकोमा आफैंले चेक बनाई पछि अंक र अक्षर थपेर एक लाख ५० हजार रुपैँयामा रकम झिकेका थिए । संस्थाको बैंक स्टेन्मेन्टबाट एक लाख रुपैँया बढि झिकेको पाएपछि बुझ्दा बैंकले नै गडबढी गरेको भन्दै बिसीले पन्छने कोशिस गरेका थिए । 
उपभोक्ता समितिका पदाधिकारी र सदस्यहरुको टोली बैंक पुगेर बुझ्दा केसीले नै एक लाख ५० हजारको चेक सटही गरेको पाईएको थियो । बिसीको गल्ति देखिएपछि प्रहरीले उनलाई पक्राउ गरेको छ । ‘उपभोक्ता समितिका पदाधिकारी र सदस्यहरु आएर घटनाबारे जानकारी गराउनु भयो ।’–बैंकका प्रमुख शम्भु पौडेलले भने–‘त्यसपछि हामीले हेर्दा एक लाख ५० हजारको चेक सटही भएको पाईयो र सिसीटिभि फुटेजमा पनि ५०० दरका तीन बण्डल नोट केसीले बुझेको देखियो ।’ 
बैंकमाथि आरोप लगाएर बैंकको प्रतिष्ठामा आँच पुर्याउने काम गरेकाले घटनाबारे कसरी अघि बढ्ने छलफल भईरहेको उनले बताए । बैंकमा भेटिएका संस्थाका उपभोक्ताहरुले भने प्रहरीलाई विसीलाई कानून बमोजिम कारवाही गर्न भनेका छन् । बिसीलाई जिल्ला प्रहरी कार्यालय हेटौँडामा राखिएको छ ।