फेकोफन नेपालको आग्रह: सामुदायीक वनको समस्या तत्काल समाधान होस

भिमसेन पौडेल 

१७ माघ,हेटौँडा। सामुदायीक वन उपभोक्ता महासंघ नेपाल( फेकोफन ) ले सामुदायिक वनमा देखिएको समस्या तत्काल समाधान गर्न आग्रह गरेको छ । 

सामुदायिक वन उपभोक्ता महासंघ मकवानपुरको आयोजनामा शनिबार हेटौँडामा भएको  पत्रकार सम्मेलनमा  फेकोफनकी केन्द्रीय अध्यक्ष भारती पाठकले सामुदायिक वनका समस्या तत्काल समाधान गर्न सरकार र  सम्बन्धित निकायलाई आग्रह गरेको छ। 

कार्यक्रममा बोल्दै पाठकले सामुदायिक वनले ढलापढा, सुखाखडा,दैविक प्रकोपले ढलेका, बुढा तथा उमेर पुगेका रुखलाई कटान गरेर उपभोक्तालाई  वितरण गर्न पाउनुपर्ने बताइन । 

'वन उपभोक्ता समुहले रुखहरुबाट दिगो र निरन्तर काठ दाउरा लगायतका वन पैदावर तत्काल संकलनगरी सदुपयोग, बिक्री वितरण गर्नु पाउनु पर्छ,डिभिजन र सव-डिभिजन कार्यालयका डिएफओहरुले कानुन निकालेर बखेडा निकाल्नु भएन'-अध्यक्ष पाठकले भनिन। 

वन मन्त्रीले वैज्ञानिक वन कार्यविधि खारेज गरेकोमा धन्यवाद व्यक्त गर्दै उनले वन ऐन २०७६ अनुसार तर्जुमा गरिने नयाँ वन नियमावलीमा सामुदायिक वनमैत्रि र दिगो वन व्यवस्थापनका कुरा समेट्न अनुरोध गरिएको बताइन।

कार्यक्रममा फेकोफन बागमती प्रदेश सदस्य खडानन्द चौलागाईं,फेकोफन मकवानपुर अध्यक्ष साधुराम चौलागाईं,स्थानिय महासंघ हेटौँडाका अध्यक्ष सम्भु प्रसाद न्यौपाने, सुन्दर सामुदायीक वन उपभोक्ता समूहका अध्यक्ष कमल लामा,रानी सामुदायीक वन उपभोक्ता समूहका अध्यक्ष कृष्ण विडारी लगायतको उपस्थिति रहेको थियो।