शब व्यवस्थापनको आधारमा कोरोनाबाट थप ६१८ मृतक थपिए

१२ फागुन, हेटौंडा । नेपालमा कोरोना भाइरसको संक्रमणबाट मृत्यु हुनेको संख्या थपिएको छ । स्वास्थ्य तथा जनसंख्या मन्त्रालयले शब व्यबस्थापनको आधारमा ६ सय १८ जना मृतक थपिएको जनाएको छ । 
मन्त्रालयका अनुसार कोभिड १९ को संक्रमणबाट हालसम्म दुई हजार ६६ जना संक्रमितको मृत्यु भएको छ । थपिएका मृतकसँगै नेपालमा कोभिड १९ बाट मृत्यु हुनेको संख्या दुई हजार ६८४ पुगेको हो ।
कोभिड १९ सम्बन्धी प्रेस ब्रिफिङ्गको क्रममा स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले ६ सय १८ जना मृतक थपिएको जानकारी दिएका हुन् । 
प्रवक्ता गौतमका अनुसार नेपाली सेनाले शव ब्यवस्थापन गर्दा आएको तथ्यांक र मन्त्रालयको तथ्यांक बारे बिस्तृत अध्ययनपछि नेपालमा हाल दर्ता गरिएको मृतकको संख्याभन्दा ६ सय १८ जना थपिएका हुन् ।
मन्त्रालयले यसअघि दुबै निकायबाट मृतकको फरक तथ्यांक आएपछि समिति गठन गरेको थियो । उक्त समितिले कोभिड १९ सम्बन्धी उच्च स्तरीय समितिमा आफ्नो प्रतिबेदन बुझाएको थियो । 
शव ब्यवस्थापनका लागि तयार गरिएको निर्देशिका बमोजिम नेपाली सेनाले शव ब्यवस्थापन गर्दा मृतकको तथ्यांक स्वास्थ्य मन्त्रालयले अद्यावधिक गर्न सकेको थिएन ।
बिरामीको दाह संस्कारपछि मात्रै कोभिड पोजिटिभ भएको प्रतिवेदन आएको घटनाहरु समेत उक्त तथ्याङ्कमा जोडिएको प्रवक्ता गौतमले बताए ।