थाहा कला केन्द्र र सिआन पुर्नस्थपना केन्द्रले कलाकार, पत्रकार तथा सर्जकलाई सम्मान गर्ने

१ चैत, हेटौंडा । थाहा कला केन्द्र मकवानपुरको आयोजना तथा सिआन पुर्नस्थापना केन्द्रको सहआयोजनामा सिआन मकवानपुर कलाकारिता अवार्ड तथा पत्रकार, सर्जक सम्मान कार्यक्रम हुने भएको छ ।
शनिवार हेटौँडामा पत्रकार सम्मेलनको आयोजना गर्दै कला केन्द्रको स्थापना दिवसको अवसरमा सम्मान कार्यक्रम आयोजना गर्न लागेको जानकारी गराइएको हो । कोरोनाका कारण स्थगन भएको अवार्ड आउँदो जेठ ९ गते गर्ने गरि तयारी सुरु गरिएको केन्द्रक अध्यक्ष सानोबाबु मोक्तानले जानकारी दिए ।
केन्द्रका अध्यक्ष मुक्तानका अनुसार ३१ बिधामा कलाकारिता अवार्ड, ११ विधामा रिकभरी अवार्ड, साहित्य क्षेत्रका ५ जना सर्जक र  १२ जना पत्रकारलाई सम्मान गरिने भएको छ । यसैगरी मकवानपुर जिल्लामा जन्मिएर राष्ट्रिय रुपमा ख्याति कमाउन सफल व्यक्तिहरु केदार घिमिरे (माग्ने बुढा), विष्णु सापकोटा (हर्के हल्दार), चेतन सापकोटा, राजेन्द्र खड्गी, निता ढुंगाना, लक्ष्मण शेष लगायतका कलाकारलाई पनि सम्मान गरिने भएको छ ।
कार्यक्रम थाहा नगरपालिकाको पालुङ जेसिज हलमा हुने र कार्यक्रममा आयोजनाका लागी ११ लाख खर्च लाग्ने अनुमान गरिएको कार्यक्रम संयोजक भुपेन्द्र राना मगरले जानकारी दिए । पत्रकार सम्मेलनमा सिआन पुन स्थापन केन्द्रका प्रमूख सौजन डिसि, आयोजक समितिका महासविच आशिष अस्लामी मगर लगाएतको उपस्थिति रहेको थियो ।