आज तराईका २० जिल्लामा सार्वजनिक विदा

२३ साउन, हेटौँडा । आज सोमबार श्रावण शुक्ल पूर्णिमा अर्थात रक्षाबन्धन । तराई क्षेत्रका विभिन्न २० जिल्लामा रक्षाबन्धन पर्वका लागि सरकारले सार्वजनिक विदा दिएको छ । गृहमन्त्रालयले विज्ञप्ति निकालेर तराईका विभिन्न २० जिल्लामा सार्वजनिका विदा दिएको हो ।
यसरी विदा दिइएका जिल्लाहरुमा झापा, सुनसरी, सप्तरी, सिरहा, मोरङ, धनुषा, महोत्तरी, सर्लाही, रौतहट, वारा, पर्सा, नवलपरासी, रुपन्देही, कपिलवस्तु, बाँके, बर्दिया, कैलाली, दाङ, कञ्चनपुर र उदयपुर रहेका छन् ।
सोमबार चन्द्रग्रहण लाग्ने हुँदा प्रायः क्षेत्रमा नाग पञ्चमीकै दिन रक्षाबन्धन मनाइएको थियो । सोमबार अर्धरात्रिपूर्व खण्डग्रास चन्द्रग्रहण परेकाले नागपञ्चमीकै दिन रक्षाबनधन मनाइएको हो । यसअघि विसं १९६३ र ०८२ तथा ०२८ र ०४७ सालमा पनि नागपञ्चमीका दिन रक्षाबन्धन पर्व मनाइएको थियो ।
तराई क्षेत्रका केही जिल्लामा भने सोमबार नै रक्षाबन्धन मनाउन लागिएको छ ।
सोमबार राति ११ बजेर ७ मिनेटदेखि ग्रहणले स्पर्श गर्ने नेपाल पञ्चाङ्ग निर्णायक समितिका अध्यक्ष प्रा डा रामचन्द्र गौतमले जानकारी दिएका छन् । राति १२ बजेर ६ मिनेटमा ग्रहणको मध्यकाल हुनेछ भने एक बजेर चार मिनेटमा मोक्षकाल अर्थात् ग्रहण सकिने छ । एक घण्टा ५७ मिनेट लाग्ने ग्रहण नेपालबाट पनि देख्न सकिने बताइएको छ ।