सुस्मिता हत्या प्रकरणमा जिल्ला अदालत मकवानपुरको आयो यस्तो आदेश

९ चैत, हेटौंडा । हेटौँडा-४ कर्राकी सुस्मिता केसी (थापा) को हत्यासम्वन्धी मुद्धामा सोमबार जिल्ला अदालत मकवानपुरले नयाँ आदेश दिएको छ ।अदालतका न्यायाधीश सिता शर्मा अधिकारीको इजलासले सोमबार नयाँ आदेश दिएको हो । 

अदालतले शवको पोष्टमार्टम गर्ने डा. दिपेश क्षेत्रीको वकपत्र बाँकी रहेकाले मुनासिव समय दिई वकपत्रका लागि बोलाउन सरकारी वकिल कार्यालयमार्फत जिल्ला प्रहरी कार्यालयलाई पत्रचार गर्न आदेश दिएको छ । त्यस्तै, विमा रकम कुन मितिमा के कति रकम को कसले बुझेको भन्ने सम्बन्धमा नेशनल लाइफ इन्स्योरेन्सलाई पत्रचार गर्न र हाल फरार रहेका अरूण कार्कीको नाममा के कति सम्पत्ति रहेको छ भन्ने खुलाई पठाउन जिल्ला सरकार वकिल कार्यालय मकवानपुरलाई लेखी पठाउन आदेश भएको छ ।

सुस्मिताको हत्यामा संलग्न भएको आरोपमा प्रहरीले उनका ससुरा, नन्द र आमाजुलाई पक्राउ गरी थुनामा राखेको छ। सुस्मिताको ससुरालाई भीमफेदी कारागारमा राखिएको छ भने अन्यलाई चितवनको भरतपुर कारागारमा राखिएको छ । यस्तै हत्यामा संलग्नको आशंका गरिएका एकजना अझै फरार छन् ।सुस्मिताको हत्या २०७७ असार १ गते राति हेटौँडा-४, कर्रास्थित आफ्नै घरमा भएको थियो।सुस्मिताको हत्यामा परिवारकै संलग्नता रहेको अनुसन्धानबाट खुलेपछि हत्या भएको करिब दुई हप्तापछि परिवारका सदस्यहरु पक्राउ परेका थिए ।