नक्कली नोट बनाउने मेसिनसहित ४ जना पक्राउ

१० चैत, चितवन । नक्कली नोट बनाउने मेसिनसहित चितवनमा ४ जना पक्राउ परेका छन् ।
पक्राउ पर्नेमा काभ्रेपलाञ्चोकको मण्डन देउपुर नगरपालिका–८ का २९ वर्षीय देवेन्द्र राई र १९ वर्षीय पवन राई रहेका छन् ।
प्रहरीका अनुसार उनीहरूलाई भरतपुर महानगरपालिका–१ बसपार्क क्षेत्रको पसलमा नक्कली नोट दिई सामान खरिद गरिरहेकाको अवस्थामा पक्राउ गरिएको हो  । नोट छाप्ने कार्यमा संलग्न थप दुईजनालाई काभ्रेपलाञ्चोक र सिन्धुपाल्चोकबाट पक्राउ गरिएको जिल्ला प्रहरी कार्यालयका प्रहरी उपरीक्षक ओम अधिकारीले जानकारी दिए । काभ्रे र सिन्धुपाल्चोकबाट मेलम्ची नगरपालिका १३ का २८ वर्षीय विश्वराम राई र २४ वर्षीय राजाराम दनुवारलाई पक्राउ गरेको प्रहरीले जनाएको छ ।
मण्डनदेउपुर–६ सिपाघाटमा रहेको विश्वराम राईको मोबाइल पसलबाट नक्कली नोट छाप्न प्रयोग गरिने ल्यापटप दुई थान, कार्ड रिडर एक थान, प्रिन्टर (फोटोकपी मेसिन) दुई थान, हार्डडिक्स एक थान बरामद गरिएको छ । राईलाई मोबाइल पसलबाटै पक्राउ गरिएको थियो ।
यस्तै मेलम्ची नगरपालिका–१२ सिन्धुखोलामा रहेको राजाराम दनुवारको मोबाइल पसलबाट प्रिन्टर एक थान, नक्कलीनोट छाप्नका लागि प्रयोग भएकोे फोटोकपी पेपर पाना २४, एउटा एफोर पेपरमा नेपाली एक हजार दरको नोट अगाडिपछाडि छापिएको पेपर एक थान बरामद गरिएको प्रहरी उपरीक्षक अधिकारीले जानकारी दिए ।