आजबाट हेटौंडामा विशेष कडाई, होटल, लज, रेष्टुरेण्टहरु बन्द हुने

file photo

१८, बैशाख, हेटौंडा ।  मकवानपुरमा कोरोना भाइरसको दोस्रो लहरको संक्रमण दर तिव्र रुपमा फैलिन थालेपछि आज शनिवारबाट विशेष कडाई गरिने भएको छ ।
जिल्ला कोभिड–१९ संकट व्यवस्थापन केन्द्रको बैठकले आज (शनिवार)बाट हेटौंडाका होटल, लज, रेष्टुरेण्ट, मिठाई पसल  तथा चिया पसलहरु अर्को निर्णय नभएसम्मका लागि बन्द गर्ने निर्णय गरेको छ ।
कोरोना भाइरसको संक्रमण दर बढीरहेको र मानिसहरुको भिडभाड हुने व्यवसायहरुल कोरोना फैलाउँन सहयोग पुग्ने भएकोले होटल, लज, रेष्टुरेण्ट, मिठाई पसल तथा चिया पसलहरु तत्कालका लागी अर्को सूचना नभएसम्मका लागी बन्द गर्ने निर्णय गरेको हो ।
टेकअवे र होम डेलिभरीको सेवा भने बिहान १० बजेदेखि साँझ ६ बजेसम्म गर्न सकिने भनिएको छ । यस्तै हेटौंडा–१० बसपार्कमा मानिसहरुको भिडभाड बढेको भन्दै त्यसक्षेत्रमा सञ्चालनमा रहेका सम्पूर्ण किराना, चियालगायतका पसल अर्को निर्णय नहुञ्जेलसम्मका लागि बन्द गरिने भएको छ । 
हेटौंडा औद्योगिक क्षेत्रमा सञ्चालित उद्योगले कार्यरत मजदुर तथा श्रमिकलाई उद्योग परिसरमै राखेर बाहिर आवतजावत हुन नदिने गरी उद्योग सञ्चालन गर्नुपर्ने भएको छ । यसैगरी व्यवसायीहरुले हेटौंडा बजार क्षेत्रमो बिहान १० देखि ६ बजेसम्म मात्र व्यवसाय गर्न पाउने निर्णय गरिएको छ । 
हेटौंडामा रहेका सम्पूर्ण निजी अस्पतालले अस्पताल परिसरमा ज्वरो क्लिनिक सञ्चालन गर्ने र हेटौंडा अस्पतालसंग समन्वय गरी स्वास्थ्यकर्मी आलोपालो उपलब्ध गराउने निर्णय भएको छ । थाहा नगरपालिकामा रहेका मालपोत र नापी कार्यालय पनि अर्को निर्णय नहुन्जेलसम्म बन्द गरिने भएको छ । 
हेटौंडा उपमहानगरपालिकाले गैरिटारमा निर्माण गरिरहेको १२० बेड क्षमताको अक्सिजनसहितको आइसोलेसन सेन्टरलाई विस्तार गरी २ सय बेडको बनाउन बागमती प्रदेशको सामाजिक विकास मन्त्रालयलाई अनुरोध गर्ने निर्णय भएको मकवानपुरका प्रमुख जिल्ला अधिकारी भरतमणि पाण्डेले जानकारी दिए ।