बाढी पहिरोले मकवानपुरमा ४ को मृत्यु, ७ वेपत्ता

२९ साउन, हेटौँडा । दुई दिनको अविरल बर्षका कारण मकवानपुरमा ४ जनाको मृत्यु भएको छ भने ७ जना वेपत्ता भएको छ ।
मकवानपुरका प्रहरी प्रमुख एसपी विकासराज खनालले ४ जनाको मृत्यु भएको र ७ जना वेपत्ता भएको पुष्टी गरेका छन् । आइतबार साँझ सम्ममा पहिरोका कारण शनिबार भीमफेदी गाउँपालिका वडा नम्बर ८ इपा पाखाटोलकी ५५ बर्षिया मिठु दानी, बकैया गाउँपालिका वडा नम्बर १० अम्बासबेसीका ९ बर्षिया पल्मा न्यासुरको मृत्यु भएको प्रहरीले जनाएको छ । बाढीका कारण बैकैया गाउँपालिका वडा नम्बर १ का ३२ बर्षिया सुनमाया मोक्तान र हेटौँडा–१३ का ज्ञानबहादुर डिम्डुङ रहेको एसपी खनालले बताए । 
बकैयाको अम्बास वेसीमा वेपत्ता भएका पल्मा बाहेक अरुको शव फेला परेको छैन । बाढी पहिरोका कारण बेपत्ता हुनेमा अम्बासका ५० बर्षिय मंगलसिं न्यासुर, उनकी ४८ बर्षिया श्रीमति सुनमाया, छोरीहरु २४ बर्षिया माया, १२ बर्षिया हिरा, १० बर्षिया सानुमाया,  र २ बर्षिय छोरा विकास, बकैया–६ का ४२ बर्षिय बीरबहादुर घलान रहेको एसपी खनालले बताए । 
प्रहरीले आइतबार दिनभरमा विपदमा परेका एक सय ४२ जनालाई उद्धार गरेको छ । हेटौँडा–४ स्थित मानवसेवा आश्रमबाट ६७ जना, हेटौँडा–४ कै कर्रा खोलाबाट १० जना, हेटौँडा–५ गर्दोहीबाट ९ जना, हेटौँडा–११ थानभर्याङबाट २० जना, मनहरी गाउँपालिका वडा नम्बर ७ बाट ३५ जना र बकैया गाउँपालिकाबाट १ जनालाई उद्धार गरेको जिल्ला प्रहरी कार्यालय मकवानपुरले जनाएको छ ।